147 nafar afg‘onistonlik tahsil olish uchun O‘zbekistonga keldi (foto)

O‘zbekistonda oliy ma’lumot olish va malakali mutaxassis bo‘lish istagida tashrif buyurgan 147 nafar afg‘onistonlik yoshlardan iborat delegatsiya 2019 yil 25 noyabr kuni “Hayraton” chegara postida tantanali kutib olindi. Bu haqda Oliy va o‘rta maxsus ta’lim vazirligi Matbuot xizmati ma’lum qildi.

Afg‘oniston Islom Respublikasi fuqarolari Prezident Shavkat Mirziyoyev tashabbusi bilan tashkil etilgan Oliy va o‘rta maxsus ta’lim vazirligi huzuridagi Afg‘on fuqarolarini o‘qitishga mo‘ljallangan ta’lim markazida tahsil olishadi.

Afg‘onistonlik yoshlardan 119 nafari O‘zbek tili va adabiyoti, 18 nafari Akusherlik va hamshira ishi hamda 10 nafari Yer usti transport tizimlari va ekspluatatsiyasi, lokomotiv va vagonlar ishi ta’lim yo‘nalishlarida o‘qishadi.

Talabalarga mashg‘ulotlar olib borish uchun Toshkent davlat o‘zbek tili va adabiyoti universiteti, Toshkent temir yo‘l muhandislari instituti hamda Toshkent tibbiyot akademiyasidan professor-o‘qituvchilar jalb etilgan.

Talabalarni kutib olish marosimida O‘zbekiston Respublikasining Afg‘oniston bo‘yicha maxsus vakili I.Irgashev, Oliy va o‘rta maxsus ta’lim vaziri o‘rinbosari S.Buzrukxonov, AIR Termiz shahridagi konsuli S.Sakandariy, AIR Oliy ta’lim vazirining o‘rinbosari A.Hoshimiy, viloyat hokimligi rahbarlari va boshqalar ishtirok etdi. “Zamin” yangiliklarini “Facebook”da kuzatib boring