Baxshi va dostonchilar uchun muhim yangilik

  • 01 may 2018, 00:30
  • 2 377
  • Madaniyat
  • Baxshi va dostonchilar uchun muhim yangilik
    Baxshichilik va dostonchilik san’atini mamlakatimizda va xorijda keng targ‘ib etish, ustoz baxshilar, dostonchilar, soha olimlari, iqtidorli yosh baxshilarni moddiy va ma’naviy qo‘llab-quvvatlash maqsadida 2018 yil 26 aprelda Vazirlar Mahkamasining “Baxshichilik va dostonchilik san’atini yanada rivojlantirish hamda takomillashtirish chora-tadbirlari to‘g‘risida”gi qarori e’lon qilindi.

    Vazirlar Mahkamasi qarori bilan “Baxshichilik va dostonchilik san’atini yanada rivojlantirish hamda takomillashtirish bo‘yicha 2018–2022 yillarga mo‘ljallangan “Yo‘l xaritasi” tasdiqlandi.

    Unga ko‘ra, Qoraqalpog‘iston Respublikasi Vazirlar kengashi hamda Samarqand, Surxondaryo, Xorazm va Qashqadaryo viloyatlari hokimliklariga “Yo‘l xaritasi”ni amalga oshirish yuzasidan alohida vazifalar yuklatildi. Xususan, “Yo‘l xaritasi”ni amalga oshirish bo‘yicha bir hafta muddatda ishchi guruhlari tuziladi. Shuningdek, “Yo‘l xaritasi” asosida ikki hafta muddatda tarmoq dasturlarini ishlab chiqish, tasdiqlash belgilangan.

    2018/2019 o‘quv yilidan boshlab mazkur viloyatlardagi ayrim musiqa va san’at maktablari qoshida baxshichilik va dostonchilik yo‘nalishi bo‘yicha ochiladigan sinflar uchun yangi o‘quv dasturlari va uslubiy qo‘llanmalar chop etiladi.

    Tarmoq dasturlarini amalga oshirish uchun zarur mablag‘lar mahalliy byudjet mablag‘lari hamda homiylarning xayriyalarini jalb qilish yo‘li bilan ta’minlanadi.

    O‘zbek baxshilik san’atini yanada rivojlantirish va targ‘ib etishga hissa qo‘shgan ustoz baxshilar va dostonchilar, xalqaro va respublika miqyosidagi nufuzli tanlovlarda yuqori o‘rinlarni egallagan yosh baxshilar va doston ijrochilariga hududlarda qurilayotgan ko‘p qavatli uylardan uzoq muddatli imtiyozli ipoteka krediti asosida xonadonlar ajratiladi.

    Yuqorida ta’kidlangan “Yo‘l xaritasi”da bir qator muhim vazifalar ko‘zda tutilgan. Xususan, Mustaqillik bayramining 27 yilligi arafasida respublikada faoliyat yuritayotgan baxshilar ijodini tarannum etadigan “Mustaqillik baxshilari” kitob-albomi chop etiladi hamda joriy yilda o‘zbek baxshichilik san’atining taniqli namoyandalari ijodiy faoliyatiga bag‘ishlangan hujjatli film yaratiladi.

    Chekka, olis hududlardagi baxshi-shoir, oqin, jirovlardan doston, terma, aytimlarni zamonaviy raqamli audio va video uskunalar yordamida yozib olish yo‘lga qo‘yiladi.

    Baxshichilik san’ati durdonasi hisoblangan xalq dostonlari haqida teleko‘rsatuv va radioeshittirishlar muntazam ravishda efirga uzatib boriladi.

    Sayyohlar ko‘p tashrif buyuradigan hududlarda, jumladan, Qoraqalpog‘iston Respublikasi, Buxoro, Samarqand, Surxondaryo, Xorazm va Qashqadaryo viloyatlaridagi tarixiy maskanlarda do‘mbira, chanqovuz, sibizg‘a, bo‘lamon, sopol nay, qo‘biz, qo‘shnay kabi o‘zbek milliy qadim cholg‘u asboblari va baxshichilik san’atiga oid adabiyotlar ko‘rgazmalari, doston va terma san’atini targ‘ib etishga qaratilgan ko‘ngilochar tadbirlar uyushtiriladi.

    Mahallalarda, istirohat bog‘larida, ta’lim maskanlarida, san’at saroylarida “Doston” kechalari, taniqli baxshi-shoirlar bilan ijodiy uchrashuvlar o‘tkaziladi.

    O‘zbek baxshichilik san’ati rivojiga katta hissa qo‘shgan atoqli baxshi-shoirlarning xotira kechalari tashkil etiladi.

    Xalq og‘zaki ijodiyoti yodgorliklarini to‘plash va nashr etish, baxshichilik san’ati, dostonlar, xalq termalari yuzasidan ilmiy tadqiqotlar olib borish keng yo‘lga qo‘yiladi.

    Xalq baxshilari faoliyati yoritilgan portretlar tayyorlanib, joylardagi 312 ta bolalar musiqa va san’at maktablariga yetkaziladi.

    Shuningdek, “Yo‘l xaritasi”da xalqaro ko‘rik-tanlov va festivallar, davlat tadbirlari hamda xorijda o‘tkaziladigan O‘zbekiston madaniyat kunlarida baxshi-shoirlarning ishtirokini ta’minlash kabi bir qator muhim tadbirlar ko‘zda tutilgan.

    Vazirlar Mahkamasining mazkur qarori hamda “Yo‘l xaritasi” bilan Qonun hujjatlari ma’lumotlari milliy bazasi orqali to‘liq tanishishingiz mumkin.

    Фикрлар

    » » Baxshi va dostonchilar uchun muhim yangilik