Rasmiy hujjatlarsiz to‘yga chiqayotgan «artistlar» aniqlandi

Foto: «Oila davrasida»
Xorazm viloyat davlat soliq boshqarmasi tomonidan konsert-tomoshalar faoliyati bilan shug‘ullanayotgan yuridik va jismoniy shaxslarning belgilangan me’yorlarga rioya etilishi yuzasidan doimiy ravishda nazorat tadbirlari amalga oshirilib kelinmoqda.

Viloyat davlat soliq boshqarmasi taqdim etgan ma’lumotlarga ko‘ra, joriy yilning o‘tgan davri mobaynida 20 ga yaqin noqonuniy konsert-tomosha faoliyati, ya’ni rasmiy hujjatlarsiz suxandonlik, raqqosalik, xonandalik va sozandalik bilan shug‘ullanib kelayotgan fuqarolar faoliyati qonuniylashtirildi. Masalan, Xiva shahrida Muhabbat Kamolova, Urganch tumanidan Umida Sobirova, Umida Abdullayeva hamda Qo‘shko‘pir tumanida Shahlo Jonibekova maxsus litsenziyasiz, to‘ylarda kelishilgan summa asosida raqqosalik bilan shug‘ullanayotgani aniqlandi.

Shuningdek, to‘y va tantanalarda hech qanday rasmiy hujjatlarsiz suxandonlik faoliyati bilan shug‘ullanib kelayotgan gurlanlik O‘marbay Allaberganov va xivalik Farrux Abdullayevning noqonuniy faoliyatiga chek qo‘yildi. Hududiy davlat soliq xizmati xodimlari tomonidan o‘tkazilgan profilaktik tadbirlar davomida Xiva shahrida Temur Davlatnazarov, Bekzod Ro‘zmetov, Urganch tumanida Dilshod Abayev, Shixnazar Ismoilov, Dilmurod Eshyozov, Xonqa tumanidan Mansur Salayev, G‘olib Ochilov hamda qo‘shko‘pirlik Sarvarbek Rahmonovning to‘y va tantanalarda litsenziyasiz noqonuniy ravishda xonandalik, sozandalik, doirakashlik hamda ovoz kuchaytirgich xodimi sifatida pullik xizmat ko‘rsatib, noqonuniy daromad topayotganliklari aniqlandi.

Ushbu holatlar yuzasidan viloyat davlat soliq boshqarmasi tomonidan hujjatlar rasmiylashtirilib, ushbu fuqarolarning faoliyatlarini qonuniylashtirishda tegishli ko‘rsatmalar berildi. “Zamin” yangiliklarini “Instagram”da kuzatib boring