Shavkat Mirziyoyev Milliy gvardiya IIV va Mudofaa vazirliklariga raqib ekanini aytdi

  • 8-12-2018, 20:50
  • 2 922
  • O‘zbekiston
  • Shavkat Mirziyoyev Milliy gvardiya IIV va Mudofaa vazirliklariga raqib ekanini aytdi
    "Nima uchun Milliy gvardiyani tashkil qildik? Nega desangiz, Ichki ishlar organiga jamoat tartibini saqlash bo‘yicha raqobat bo‘lishi kerak. Bitta organga ishonsak, hech qachon natija bo‘lmaydi. Faqat IIV emas, kerak bo‘lsa Mudofaa vazirligini ham qo‘shamiz", dedi Konstitutsiyaning 26 yilligiga bag‘ishlangan tantanali tadbirda O‘zbekiston prezidenti Shavkat Mirziyoyev.

    "...jinoyat oldin qachon sodir bo‘lardi? Kechasi 11dan (ertalab) oltigacha. Lekin 11 dan oltigacha hamma idoralar rahbarlari dam olardi. Bu qanday jinoyatni jilovlash bo‘ldi? ... Shu uchun kechasi Toshkentda sudya ham, prokuror ham ishlaydi. Kechasi Toshkentda ishlaydigan alohida Milliy gvardiya, alohida ichki ishlar organlari rahbarlari (bor). Bevosita 24 soatlik ishga o‘tilgan", - dedi prezident.

    Davlat rahbari so‘zlariga ko‘ra, O‘zbekistonda umumiy jinoyatchilik 36 foizga kamayishiga erishilgan, 3205 ta yoki 35 foizdan ziyod mahallada birorta ham jinoyat sodir etilmagan.

    Mirziyoyev Milliy gvardiya nima uchun tuzilganiga to‘xtalar ekan, u mamlakat tinchligini saqlash uchun tuzilganini ta’kidladi.

    "...jahon hamjamiyatiga chiqayapmiz O‘zbekiston nomini tarannum etib. Ular birinchi so‘raydi, u yurt tinchmi deb. Eng katta kafolat ana shu tinchligimiz. Shuni uchun kecha bitta qaror qabul qildik. Qoraqalpog‘iston respublikasida jinoyatchilikning olidini olish bo‘yicha mutlaqo yangi tizim - Qoraqalpog‘iston tajribasi bo‘ladi", - dedi O‘zbekiston rahbari va bu haqda keyinchalik o‘zi hisobot berishini qo‘shimcha qildi.

    O‘zbekiston rahbari korrupsiya bor joyda jinoyat ochilmay qolishini, shu bois, endilikda jinoyatni ochmaydigan uchastkavoylar jarimaga tortilishini qo‘shimcha qildi.

    "Hozir ichki ishlar tizimida hamma bir xil oylik oladi. Endi unday bo‘lmaydi. Jinoyatni ochgan odamga oyligiga katta pullar beramiz, jinoyatni ochmagan uchastkavoylar oyligiga 50 foiz jarima solamiz. Adolat hamma joyda bo‘lishi kerak. Ishlagan odamni rag‘batlantiramiz, ishlamagan odamlar bilan xayrlashamiz", dedi Mirziyoyev.

    Manba: Sof.uz

    » » Shavkat Mirziyoyev Milliy gvardiya IIV va Mudofaa vazirliklariga raqib ekanini aytdi