Olimpiada sovrindori Murodjon Ahmadaliyevga Namangandan ikki xonali xonadon kaliti berildi

  • Sport
  • 31-08-2016, 13:46
  • 1 286
  • Olimpiada sovrindori Murodjon Ahmadalievga Namangandan ikki xonali xonadon kaliti berildi

    Rio-de-Janeyro shahrida o‘tkazilgan Yozgi Olimpiya o‘yinlarida Namangan boks maktabi tarbiyalanuvchisi Murodjon Ahmadaliev bronza medalini qo‘lga kiritdi.

    Bokschiga mazkur yutug‘i uchun Prezident tomonidan "Malibu" avtomashinasi sovg‘a qilindi. Bu haqida Namangan viloyat hokimligining axborot xizmati bergan ma’lumotga asoslanib "Kun" xabar qildi.

    30 avgust kuni ushbu avtomashinada poytaxtdan yo‘lga otlangan Murodjon Ahmadaliev Namanganda bayramona kayfiyatda, olqishlar bilan kutib olindi. Namangan viloyati hokimligida g‘olib sportchini sharaflash marosimi tashkil qilindi. Unda viloyat sport jamoatchiligi vakillari, ustoz murabbiylar, sportchi yoshlar ishtirok etdi.

    Viloyat hokimi, Oliy Majlis Senati a’zosi Xayrullo Bozorov yig‘ilganlarni istiqlolning 25 yillik bayrami bilan samimiy tabrikladi. Murodjon Ahmadalievni eng nufuzli sport musobaqasida erishgan bronza medali, "O‘zbekiston Respublikasida xizmat ko‘rsatgan sportchi" faxriy unvoniga sazovor bo‘lgani bilan qutladi.

    Tantanali marosimda iqtidorli bokschiga viloyat hokimligi tomonidan Namangan shahrining Boburshoh ko‘chasida barpo etilayotgan ko‘pqavatli uydan ikki xonali xonadon kaliti berildi. Sportchining ota-onasi Qahhorjon Ahmadaliev, Oyshaxon aya Fayozovaga, 77 yoshli buvisi To‘xtaxon aya hamda ustoz-murabbiylari Ilhomjon Mirzaholov, Qobiljon Karimovga qimmatbaho esdalik sovg‘alari topshirildi.

    Яндекс.Метрика