"Eyr Fors" bosh murabbiyi: "Ertaga stadionga keladigan muxlislar biz g‘alaba qozonsak xafa bo‘lishmasin"

OChL-2019 saralash bosqichi doirasidagi "Paxtakor" va "Eyr Fors" klublari o‘rtasidagi o‘yindan oldingi matbuot anjumanining ikkinchi qismida bosh murabbiyi Bosim Qosim va Saad Notiq ishtirok etishdi.
"Paxtakor" bilan uchrashuvga imkon qadar yaxshi tayyorgarlik olib borishga harakat qildik. Oxirgi ikki o‘yinda yaxshi saviyadagi jamoalarga qarshi durang natija qayd etdik. Bundan tashqari ertaga uch nafar futbolchi jarohat sababli maydonga tusha olmaydi", - deydi Bosim Qosim.

"Ertangi uchrashuvdan oldin bildira oladigan yagona fikrim barcha futbolchilarning kayfiyati juda yaxshi. Bizga xalal berishi mumkin bo‘lgan jihat uch nafar yetakchining o‘ynamasligi. "Paxtakor" yaxshi saviyadagi futbolchilarga ega", - deydi Saad Notiq.

- Aynan qaysi futbolchilar jarohat olishgan?
- Bular yarim himoyachilar Ali Husni, Karrar Nabil va darvozabon Amjad Rahim.

- Osiyo Kubogida sizning klubdan necha nafar futbolchi qatnashdi?
- Uch futbolchi. Darvozabon Muhammad Kassid, Ali Husni va Saad Notiq.

- Siz O‘zbekiston klublariga yoki terma jamoalariga qarshi o‘ynaganmisiz? Bizning futbol haqida fikrlaringiz qanday?
- 2005 yilda aynan shu stadionda "Al Zavra" klubi safida futbolchi sifatida kelganman va 2:1 hisobida g‘alaba qozonib qaytgan edik.

- "Paxtakor"ni qanchalik darajada o‘rgandingiz. Jamoa safida kimni alohida ko‘rsata olasiz?
- Ertangi o‘yinga hozirlik ko‘rish doirasida raqibni imkon qadar o‘rganib chiqdik. Jamoa safida tajribali futbolchilar bor. "Paxtakor"ni kuchli mutaxassis boshqarib bormoqda. Raqibning chap qanot yarim himoya chizig‘i kuchli. Bundan tashqari jamoa sardori ham kuchli.

- "Eyr Fors" oxirgi uch yilda OFK kubogida g‘olib chiqqan. Buning siri nimada?
- OFK kubogi qit’amizning nufuzli musobaqalaridan biri hisoblanadi. Bunday muvaffaqiyatga erishish uchun jamoa o‘z oldiga katta maqsad qo‘yishi kerak. Bir maqsad yo‘lida birlashish lozim. Butun mavsumni bir xil darajada o‘tkazish kerak. Agar tarkibimizda kuchli va mahoratli futbolchilar yig‘ilmaganda uch yil ketma-ket bu musobaqada g‘olib chiqa olmagan bo‘lardik. Bundan tashqari bizni o‘z maydonimizda doim minglab muxlislar qo‘llab turishardi. Ertaga ham stadion to‘lishini kutamiz.

- Ertaga stadionda sizlarning muxlislaringiz bo‘lmasligi "Eyr Fors" o‘yiniga ta’sir qilmaydimi?
- To‘g‘ri safarda o‘ynaymiz. Yaxshi o‘yin ko‘rsatib, qayerda bo‘lsa ham bizni qo‘llab turgan muxlislarni xursand qilishga intilamiz. 2005 yilda "Paxtakor" stadioni deyarli to‘lgandi. Ertaga ham ko‘plab muxlislar kelishini kutayapman. Faqat biz g‘alaba qozonsak ular xafa bo‘lishmasin.

- Bu o‘yinga ikki klub ikki xil formada yetib kelmoqda. "Paxtakor" uchun hali mavsum boshlanmagan, sizlar uchun mavsumning o‘rtasi.
- To‘g‘ri aytib o‘tdingiz. Bu narsa o‘yinga ta’sir qilishi mumkin. "Paxtakor" xorij yig‘inlarini o‘tkazdi, ular ham ertangi bahsga ancha jiddiy tayyorgarlik olib bordi. Ikkala jamoa ham ertaga g‘alaba qozonishni istaydi.

Manba: Championat.asia “Zamin” yangiliklarini “Facebook”da kuzatib boring