Joze Mourino: "Messidan faqat qafas qutqaradi"

  • 25 aprel 2019, 00:32
  • 890
  • Sport
  • Joze Mourino: "Messidan faqat qafas qutqaradi"
    Yevropa ChL chorak finalining hayajonli spektakllaridan keyin RT nashri jurnalistlari tahlilga usta portugaliyalik mutaxassis Joze Mourino huzuriga oshiqishdi. Chunonchi, betakror hissiyotlarni «Benazir»ning «tesha tegmagan» iboralari vositasida ifoda etish dramaning davomidek tuyuladi.

    - Aytingchi, shaxsan siz qachondir «Manchester Siti» - «Tottenxem» bahsidek o‘tkir syujetli dramani tomosha qilganmisiz?
    - Ha, albatta. To‘g‘ri, aynan shunday ssenariy asosida bo‘lgan bahslarni topish mushkul, ammo hattoki, ChLda ham hayratomuz gollar va yechimlar bilan yakunlangan bellashuvlar ko‘p kuzatilgan. Deylik, «Barselona» tomonidan «PSJ»ga qarshi bahsda amalga oshirilgan «kambek»ni misol sifatida ko‘rsatish mumkin. O‘shanda Kataloniya grandi oldida oxirgi yarim soatda 3ta gol urish zarurati turgandi. Shaxsan o‘zim «Chelsi» boshqaruvida aynan «Barselona» to‘sig‘idan shunday qiyinchilik bilan o‘tganman. Demoqchimanki, bunday ehtiroslarga boy o‘yinlar o‘ta yirik turnirlarga ham begona emas. Dastlabki uchrashuvlar yakunlangach, asosiy kurash hali oldinda ekanligini aytgandim. Qarang, bir hafta burun 4ta uchrashuvda 6ta gol urilgandi. Endi esa bittasida 7ta gol ko‘rdik.

    - Agar VAR Rahim Sterlingning so‘nggi daqiqalardagi golini bekor qilmaganida, yarim final yo‘llanmasi «Siti»ga nasib etardi. Hakamlarning o‘sha qaroriga qo‘shilasizmi?
    - Hammasi adolatli. Videotakrorlar ko‘plab musobaqalarda qo‘llanilmoqda. Ba’zida tizim menga yoqayotgandek tuyuladi, goho aksincha, nafratim jo‘shib ketadi. Ko‘pincha VAR futbolcha ehtirosni o‘ldirayotgani haqida o‘ylayman, undan foydalanish xatolikdek ko‘rinadi. Biroq endi VARning hakamga ishonchli ko‘makchi ekanligini inkor etish mumkin emas. Dunyodagi hech bir laynsmen 5 santimetrli «ofsayd»ni aniqlay olmaydi. VAR esa buni yana bir bora uddaladi.

    - Qolaversa, Lorente darvozani ishg‘ol qilgan pallada qo‘lini ishga solgandek ko‘rindi...
    - Ha, shuning ortidan kichik mojaro ham yuzaga keldi. O‘ylashimcha, hakam golni inobatga olib to‘g‘ri qildi. Harqalay, shaxsan men o‘yinchining qo‘lidan foydalanmoqchi bo‘lganini ko‘rganim yo‘q. Albatta, takroriy lavhadan keyin referiga e’tiroz bildirish mumkin. Zero, VAR yakuniy qarorni bosh hakam vakolatida qoldiradi. Umuman olganda, Junayt Chaqirning o‘sha vaziyat yuzasidan chiqargan qaroriga to‘liq qo‘shilaman.

    - Qiziq, tomonlar nimaning evaziga atigi 21 daqiqada 5ta gol urishga ulgurishdi?
    - Muhimi, yuz bergan shoudan muxlislar chinakamiga zavqlanishdi, bunga shubham yo‘q - ajoyib tomosha. Ammo men barchasiga murabbiy nigohi bilan razm soldim - bu ChL saviyasiga xos o‘yin emas. Axir saviyali futbolchilarning qisqa vaqt oralig‘ida shuncha xatoga yo‘l qo‘yishlarini tasavvurga sig‘dirish qiyin!

    - Xatolarga kuchli bosim sabab emasmikin?
    - Qo‘ysangizchi, yuqori saviyali o‘yin-chilar bosimni tan olishmaydi. Demoqchimanki, ruhiy holat xususida gapirish ortiqcha va xatolarni shunga bog‘lash ham noo‘rin. Chunonchi, aksar gollar himoyadagi xatoliklar ortidan keldi. Demakki, orqa chiziq vakillari raqiblarga juda ko‘p bo‘shliqlar yaratishdi, zarbalarga to‘sqinlik qila olishmadi. Mayli, yarim final bahslari ham shunday sermahsul bo‘lishiga qarshiligim yo‘q. Lekin shuning barobarida jamoalar ijrosida kamroq xato kuzatilishi tarafdoriman.

    - Serxio Agueroning golidan keyin «Siti» g‘alabani qo‘ldan chiqarmaydigandek ko‘ringandi...
    - «Shaharliklar» raqibga erkin harakatlanish imkoniyatini berib qo‘yishdi. Qolaversa, murabbiylar Leroy Sane, Gabriel Jezus va Fernandino kabi saviyali o‘yinchilarni zaxirada qoldirishdi. «Shporlar» aksincha, eng sara vakillarini jangga tashlashdi. Pochettinoda o‘zgacha variant ham yo‘q edi. To‘g‘ri, Mussa Sissoko o‘yindan chiqqach, «Tottenxem» mag‘lubiyatga uchraydi, deb o‘ylagandim. Chunki Lorente tezlik bobida Sissokodan zaifroq, uning Son Xyun Minni qo‘llay olishiga ishonmagandim. Aslida o‘yin nazorati mezbonlar tarafida edi. Lekin ispaniyalik hujumchi gavdasi bilan to‘pni darvozaga yo‘llagach, vaziyat tamoman o‘zgardi. Ha, Gvardiola burilish yasashga urinib ko‘rdi. Pochettino esa 5-himoyachini maydonga tushirish bilan javob qaytardi. Hammasi reja asosida ketayotgan bir pallada Eriksen jiddiy xatoga yo‘l qo‘ydi, ammo uni VAR qutqarib qoldi.

    - Boz ustiga, londonliklar Garri Keynsiz maydonga tushishdi.
    - Uning yo‘qligi deyarli sezilgani yo‘q. «Tottenxem» o‘ng qanotdagi Lukas Moura va erkin hujumchi Son Xyun Min bilan o‘ta xavfli raqibga aylandi.

    - Endi «Tottenxem» Ronaldu va «Yuventus»ni «ofsayd»da qoldirgan «Ayaks» bilan final yo‘llanmasi uchun kurashadi. Gollandiya klubi yuksak natijaga erishib bo‘lgani haqidagi fikrlarga qo‘shilasizmi?
    - Shak-shubhasiz. «Yuventus» - «Ayaks»ga bor kuch-qudratini bemalol namoyish etish imkoniyatini bergan navbatdagi qurbon. Hayronman, ams-terdamliklarni hech kim nazarga ilmay, ularning istagancha to‘p surishlariga to‘sqinlik qilmayapti. Ko‘rinib turibdi, Erik ten Xag o‘z jamoasiga ajoyib ijrochilarni to‘plabdi. Ularning ayrimlari YeLda o‘ynash tajribasiga egalar. Yetakchi o‘yinchilar - Dushan Tadich va Deyli Blindda taktik va ruhiy tayyorgarlik a’lo darajada. «Ayaks»ning falsafasi - grandlarga qarshi hech qanday bosimni his etmagan holda, ko‘tarinki kayfiyatda to‘p surish. Yarim final qanday natija taqdim etishidan qat’iy nazar, «Ayaks»ni hozirning o‘zida mavsum kashfiyoti sifatida ta’riflasak bo‘laveradi. Bu marraga turli yo‘llar bilan kelish mumkin. Gollandiyaliklar esa o‘ta mashaqqatli yo‘lni chiroyli tarzda bosib o‘tishdi.

    - Bu jamoani asosiy «qurol»laridan judo qilish, loaqal xavfini kamaytirish uchun nima qilish kerak? Har holda, siz boshqargan jamoa YeL-2017 finalida «Ayaks»ni yengish uddasidan chiqqandi.
    - O‘sha uchrashuvdan keyin gollandiyaliklar nimalar deyishganini o‘qisangiz, hammasini tushunib olasiz. Raqib murabbiylari va o‘yinchilari bizning o‘yinimiz ularga yoqmaganidan noligandilar. Aniqrog‘i, taktik uslubimiz, Maruan Fellayni va jismoniy holatimizdan arz qilishgandi. Qisqasi, agar «Ayaks» finalga chiqsa, «Barselona» yoki «Liverpul»ni ham bemalol mahv etishi mumkin.

    - «Ayaks»ning g‘alaba golini 19 yoshli Matteys de Ligt urdi. Bu futbolchi haqida qanday fikrdasiz?
    - Uni o‘ta noyob iqtidor sohibi sifatida ta’riflamasdim. Hozirda 17 yoshli yigitchalarning bo‘y ko‘rsatishlari tez-tez kuzatilmoqda. Frans Bekkenbauerni eslang, u himoya chizig‘ida juda barvaqt mukammal o‘yin ko‘rsatgan. De Ligt 2 yil avval «MYu»ga qarshi to‘p surgandi. O‘shanda uning yoshini faqat pasporti orqali bilib olish mumkin edi. Ya’ni o‘yinda o‘zidan 10 yosh katta tajribali himoyachidek taassurot qoldirgandi. Matteysning ustun tomoni shuki, u «Ayaks»dek ajoyib jamoada eng muhim pozitsiya - markaziy himoyachi rolida maydonga tushmoqda. Uni Virjil van Deykka qiyoslasha boshlashdi, ha, ikkisining o‘yinida o‘xshash jihatlar bor. Ular o‘z klublarida yetakchi, harakatlari sustroq ko‘rinsada, aslida unday emas. Eng muhimi, o‘yinni yaxshi tushunishadi, to‘p bilan risoladagidek muomala qilishadi va zarur payt hujumga qo‘shilib, gol urishni ham o‘rniga qo‘yishadi.

    - «Liverpul» sobiq klubingiz -«Portu» qarshiligini osongina yengdi - umumiy hisob 6:1ga yetgani barchasini ko‘rsatib turibdi. Bu to‘qnashuv qanday taassurot qoldirdi?
    - Asosiysi, «Portu» g‘ururini yo‘qotmagan holda o‘ynadi, qandaydir mo‘’jiza ko‘rsatishga urindi. Lekin raqib kuchli edi.

    - Umuman, «Liverpul» o‘tgan yilgidan kuchliroqmi yoki...?
    - Shaxsiy fikrimcha, kuchliroq. Har holda, jamoa ixtiyorida hujum va qarshi hamla bobidagi salohiyatini oshirish uchun 1 yil vaqt bor edi. Virjil van Deyk shunchaki, mohir futbolchi emas, balki chinakam yetakchi. Tarkib kun sayin uyushqoq va tezkor bo‘lib bormoqda. Agar «Barsa» tarkibida Messi bo‘lmaganida, «Liverpul»ning finalga chiqishini bemalol taxmin qilardim.

    - Hozirgi «Barselona» uchun Messi qanchalik muhim?
    - O, Leosi bor va uningsiz «Barsa» o‘rtasidagi farq juda katta. Yo‘q, Messini o‘ta noyob futbolchi sifatida maqtashim shart emas. Chunki barchasini uning o‘zi muntazam ravishda isbotlamoqda. «MYu»ga urgan 2ta goli eng yuksak e’tirof uchun kifoya...

    - «Barselona» va «MYu» 2 xil o‘yin namoyish etdi, shundaymi?
    - Ha, zero, «MYu» javob uchrashuviga o‘zgacha yondashuv bilan kirishdi. Mankunianliklar maydon markazini egallashlari lozim edi. Messini zararsizlantirish borasida turli rejalar tuzish mumkin, ammo buni amalda ko‘rsatish uchun chinakam qafas hosil qilish talab etiladi. Biroq bu oson emas. Oddiy aytganda, Messini ushlab qolishning iloji yo‘q. Ha, Manchesterda mezbonlar bu vazifani qisman uddalashdi: Leo goh Fred, goh Maktominayga duch keldi. Lekin «MYu» 0:1 hisobida imkoniyatni boy berdi, baribir. Natijada o‘yinini o‘zgartirishga majbur bo‘ldi.
    Xususan, Lingard hujumchi ortidan joy olgach, Fred tayanch hududida yolg‘iz qoldi. To‘pni egallab olgan Messini yagona ta’qibchi bilan to‘xtatib bo‘lmasligini ko‘p bora takrorlaganman. Maydonda u qafas ichida qolsagina jamoasiga naf keltirolmaydi. Raqib jamoa o‘yinchilari ko‘pchilik bo‘lib uni qurshab olishlari va erkin harakatlanishiga xalal berishlari shart. Biroq mankunianliklar bu missiyani uddalolmadilar. Xatoga yo‘l qo‘ygan David de Xea mening himoyamga muhtoj emas. Deylik, «MYu» APLdagi oxirgi bellashuvda aynan uning ajoyib «seyv»lari yordamida qimmatli 3 ochko olgandi. Davidning «Kamp Nou»dagi xatosiga kelsak, futbolda hech qaysi kiper bunday holatlardan himoyalanmagan.

    - Xo‘sh, chorak finalda kurashdan chetga chiqqani tufayli «MYu»ga achinish o‘rinlimi? Har holda, jamoa 2 daqiqa ichida 2:0 hisobida oldinga o‘tib olish imkoniyatiga ega bo‘lgandi...
    - «MYu» qanday jamoaga qarshi to‘p surganini ham unutmaylik. Hozirda «Barselona» har taraflama yuqoriroq saviyada. Xullas, kataloniyaliklar haqli ravishda ustun kelishdi. To‘g‘ri, «MYu» 1-daqiqadagi vaziyatni golga aylantirganida, uchrashuv ssenariysi butunlay o‘zgarib ketishi hech gap emasdi.

    - Oxirgi savol - o‘tgan haftaning asosiy qahramoni kim?
    - «Ayaks» bosh murabbiyi Erik ten Xag. U shogirdlarini Turinga olib keldi va «Yuventus»ni yengdi. Yengganda ham, yaqqol ustunlik va oqilona yondashuv bilan! Xullas, men uchun hafta qahramoni - ten Xag!
    Sodiq SOBIR tayyorladi.

    Manba: interfutbol.uz

    Фикрлар

    » » Joze Mourino: "Messidan faqat qafas qutqaradi"