16:11 / 09.09.2016
7 557

Shavkat Mirziyoyev O‘zbekiston oldidagi ustuvor vazifalarni sanab o‘tdi

Shavkat Mirziyoyev O‘zbekiston oldidagi ustuvor vazifalarni sanab o‘tdi

O‘zbekiston prezidenti vazifalarini bajarish zimmasiga yuklatilgan Shavkat Mirziyoyev O‘zbekiston Respublikasi Oliy Majlisi Qonunchilik palatasi va Senatining qo‘shma majlisidagi nutqi vaqtida mamlakat oldida turgan ustuvor vazifalarni aytib o‘tdi. Bu haqda "Kun" xabar berdi.

Shavkat Mirziyoyev qayd etdiki, O‘zbekiston keyingi yillarda erishilgan yuqori iqtisodiy o‘sish ko‘rsatkichlarini mustahkamlab, makroiqtisodiy barqarorlikni saqlab qolishi kerak.

«Birinchidan, makroiqtisodiy barqarorlikni yanada mustahkamlash va keyingi yillardagi iqtisodiy o‘sish sur’atlarini saqlab qolish zarur. Milliy valyutamiz barqarorligini ta’minlash, bank tizimini mustahkamlash, mamlakatimizda va mahalliy darajada byudjet barqarorligini ta’minlash bo‘yicha qo‘shimcha kompleks chora-tadbirlarni amalga oshirish kerak. Bunda chetdan qarz olish bo‘yicha konservativ yondashuv siyosatini davom ettirish, davlatning tashqi qarzi haddan ziyod oshib ketishiga yo‘l qo‘ymaslik muhim ahamiyat kasb etadi. Bularning barchasi Islom Abdug‘anievich Karimovning avvalo o‘zimizning kuch va imkoniyatlarimizga tayanish zarurligi haqidagi uzoqni ko‘zlagan strategiyasini davom ettirish bilan bog‘liq», - deya qayd etgan Shavkat Mirziyoyev.

«Ikkinchidan, nodir va qimmatbaho metallarni chuqur qayta ishlash, oziq-ovqat va kimyo sanoatini rivojlantirish bo‘yicha qabul qilingan dasturlarni amalga oshirishimiz zarur», - degan u.

«Uchinchidan, tashqi bozorlarda raqobat va beqarorlik kuchayib borayotgan sharoitda iqtisodiyotning real tarmoqlari bilan bir qatorda mamlakatimiz hududlarida ham raqobatdosh mahsulotlar ishlab chiqarishni ko‘paytirish va eksport salohiyatini oshirish alohida ahamiyatga ega», - deya qayd etgan u.

«Ana shu maqsadda kichik biznes va xususiy tadbirkorlik sub’ektlari, shuningdek, fermer xo‘jaliklarining eksportda ishtirok etishini yanada rag‘batlantirish bo‘yicha qo‘shimcha kompleks chora-tadbirlarni amalga oshirish zarur. Bu iqtisodiy o‘sish, tarmoqlar va hududlarni rivojlantirish, aholining mehnat bilan bandligini ta’minlash va moddiy farovonligini oshirishning asosiy lokomotivi bo‘lishi kerak», - degan Shavkat Mirziyoyev.

«To‘rtinchidan, Islom Abdug‘anievich Karimovning xususiy tadbirkorlik va kichik biznes sub’ektlari manfaatlarini mustahkam himoya qilish to‘g‘risidagi talab va topshiriqlari ijrosini izchil davom ettirish darkor. Turli byurokratik to‘siqlar va asossiz tekshiruvlarni bundan keyin ham qat’iyat bilan cheklash zarur», - deya qo‘shimcha qilgan u.

«Beshinchidan, eng muhim ijtimoiy-iqtisodiy vazifa — Oliy Majlis palatalari tomonidan tasdiqlangan Aholining mehnat bilan bandligini oshirish dasturini bajarishdan iborat. Yil oxiriga qadar bir milliondan ziyod yangi ish o‘rinlarini tashkil etishimiz zarur. Kasb-hunar kollejlarining 480 ming nafar bitiruvchisini ishga joylashtirish masalasi alohida nazoratni talab qiladi. Biz jamiyatning ijtimoiy tabaqalanish darajasini pasaytirish, mamlakatimizda o‘ta boylar ham, o‘ta kambag‘allar ham bo‘lmasligi bo‘yicha Islom Abdug‘anievich tomonidan belgilab berilgan siyosatni qat’iy davom ettiramiz», - deydi u.

«Oltinchidan, xalqaro kommunikasiya tarmoqlariga ulangan zamonaviy yo‘l-transport va muhandislik infratuzilmasini shakllantirish, shuningdek, milliy axborot-kommunikasiya tizimlarini rivojlantirish bo‘yicha O‘zbekiston Respublikasi Prezidenti tomonidan puxta o‘ylangan va ishlab chiqilgan strategiyani amalga oshirishni davom ettiramiz», - deya qayd etgan Shavkat Mirziyoyev.

Shavkat Mirziyoyev aytdiki, bugungi sharoitda eng ilg‘or axborot-kommunikasiya texnologiyalarini keng joriy etish ustuvor ahamiyat kasb etmoqda.

«Bu sohada qabul qilingan Milliy dasturga muvofiq, telekommunikasiya texnologiyalarini, aloqa tizimlari va infratuzilmasini yanada rivojlantirish, informasion tizimlar komplekslari va «Elektron hukumat» axborot bazasini shakllantirishimiz kerak», deya qo‘shimcha qiladi u.

Uning so‘zlariga ko‘ra, mamlakat hududlarini kompleks rivojlantirish sohasidagi ishlarni davom ettirib, Qarshi, Shahrisabz, Toshkent, Termiz, Namangan va Urganch shaharlarini obodonlashtirish bo‘yicha mamlakat prezidenti tomonidan qabul qilingan qarorlarning amalda bajarilishini ta’minlash kerak.

«Qishloq xo‘jaligini yanada isloh qilish va rivojlantirish bo‘yicha birinchi navbatdagi vazifa — ko‘p tarmoqli fermerlikni rivojlantirish, har bir fermer xo‘jaligining iqtisodiy samaradorligi va moliyaviy barqarorligini ta’minlashdir. Bu masalani biz mamlakatimiz oziq-ovqat xavfsizligini ta’minlashning garovi deb hisoblaymiz», deydi u.

«Biz Islom Abdug‘anievich Karimov tashabbuskori bo‘lgan qishloqlarimiz qiyofasini tubdan o‘zgartirish, qishloq aholisi uchun shahar darajasidagi turmush sharoitini ta’minlaydigan namunaviy uy-joylarni va tegishli infratuzilmani qurish bo‘yicha dasturni faol davom ettiramiz.

Ta’lim va tarbiya, ilm-fan, sog‘liqni saqlash, madaniyat va san’at, sportni rivojlantirish masalalari, yoshlarimizning chuqur bilimga ega bo‘lishi, chet tillarini va zamonaviy axborot-kommunikasiya texnologiyalarini puxta egallashini ta’minlash doimiy ustuvor vazifamiz bo‘lib qoladi.

Eng muhim yo‘nalishlardan yana biri — jamiyatimizda demokratik jarayonlarni chuqurlashtirish, fuqarolik institutlari rivojlanishini qo‘llab-quvatlash, siyosiy partiyalarning obro‘-e’tibori va ta’sirini oshirish, saylovchilarning ovozi uchun raqobatni kuchaytirishdan iborat», - deya qayd etgan Shavkat Mirziyoyev.

arenda kvartira tashkent


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » O‘zbekiston » Shavkat Mirziyoyev O‘zbekiston oldidagi ustuvor vazifalarni sanab o‘tdi