22:15 / 16.08.2018
8 081

Гулнора Каримова судда ютқазди

Гулнора Каримова судда ютқазди
Аввалроқ, Гулнора Каримованинг адвокати у билан учрашиш учун Тошкентга келгани ҳақида хабар берилган эди. Адвокат Грегуар Манжа мижози билан учрашиб, Швейцария прокуратураси Каримовага тегишли 800 миллион доллар пулни Ўзбекистонга қайтариш ҳаракатини бошлагани юзасидан шикоят аризаси топширишни муҳокама қилмоқчи эди, деб ёзмоқда "Ҳордиқ" нашри.

Жорий йилнинг 31 июль куни Швейцариянинг Жиноий ишлар бўйича федерал суди Гулнора Каримованинг аппеляциясини бекор қилган. Мазкур қарор Каримовага тегишли деб тахмин қилинган 800 миллион доллар пулни Ўзбекистонга қайтариш жараёнида муҳим қадам бўлган.

Женевалик адвокат Грегуар Манжа томонидан Жиноий ишлар бўйича федерал судга берилган шикоят апелляциясида федерал прокуратуранинг Швейцария банкларида музлатиб қўйилган 800 миллион долларни мусодара қилиш ҳақидаги қарорига норозилик билдирилган.

Жорий йил 22 май куни Швейцария прокуратураси иккита ордер чиқарганди. Унда 2012 йил Женева ва Цюрихдаги банкларда музлатиб қўйилган 800 миллион долларнинг 686,7 миллион долларини Ўзбекистонга қайтариш назарда тутилганди.

Бундай қарор чиқарилишига Гулнора Каримова ишонган икки шахс: Гаяня Авакян ва Рустам Мадумаровларнинг иқрор бўлиб, берган кўрсатмалари асос бўлган. Улар бу пуллар Ўзбекистондан ўғирланганини тан олганлар ва қайтарилиши кераклигини айтганлар.

Шу билан бирга, Авакян ва Мадумаров уларга нисбатан очилган жиноий ишни Гулнора Каримова иши якунланмасидан ниҳоясига етказишларини сўраган.

Эслатиб ўтиш жоизки, Ўзбекистон Бош прокуратураси Гулнора Каримова жиноий иши бўйича тўлиқ расмий маълумотни эълон қилган эди. Унда қайд этилишича, ҳозирда 12 та хорижий давлат ҳудудида 1 млрд 394,1 млн АҚШ доллари, 63,5 млн евро, 27,1 млн фунт ва 18,5 млн франк миқдордаги маблағ легаллаштирилган.

Гулнора Каримованинг коррупция ва пулни ўзлаштириш билан боғлиқ жиноятларни содир этишдаги айби уюшган жиноий гуруҳ аъзолари Н.Содиқов, Р.Мадумаров, Ш.Собиров ва бошқаларнинг, гувоҳлар, жабрланувчиларнинг кўрсатувлари, уюшган гуруҳ назоратидаги 45 та хўжалик юритувчи субъектлар ва 16 та компанияларнинг фаолиятини текшириш материаллари, олинган ёзма ва ашёвий далиллар, экспертиза хулосалари ҳамда иш бўйича тўпланган бошқа далиллар билан ўз тасдиғини топган.

Гулнора Каримовага Ўзбекистон Республикаси Жиноят кодексининг 168, 178, 182, 189, 228 ва 243-моддалари билан айблов эълон қилиниб, унга нисбатан қамоққа олиш эҳтиёт чораси қўлланилган.

arenda kvartira tashkent


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Жамият » Гулнора Каримова судда ютқазди