Барселона бош мураббийи Ханси Флик келаси мавсумда Хосе Моуриньо билан юзага келиши мумкин бўлган шов-шувли қарама-қаршиликни мамнуният билан кутиб олишини айтди. "Maxсус" (Специал Оне) лақабли мураббий Реал Мадрид бошқарувида Альваро Арбелоа ўрнини эгаллаши кутилмоқда, бу эса Ла Лигада янги мураббийлар рақобатига замин яратади. Бу ҳақда Goal.com хабар беради.
Португалиялик мутахассиснинг Сантиаго Бернабеу стадионига қайтиши ҳақидаги хабарлар 2010-йиллар бошидаги El Clasico муҳитини қайта жонлантириши мумкин. Собиқ Челси ва Манчестер Юнайтед устози билан тўқнаш келиш эҳтимоли ҳақидаги саволга Флик хотиржам жавоб берди: "Ҳа, нима учун йўқ? У рақиб жамоа мураббийи ва мен ҳар доим ҳар қандай рақибга қарши туришга тайёрман".
Барселона устози бу фикрларни Ла Лиганинг сўнгги турида Валенсияга қарши ўйиндан (1:3) сўнг билдирди. Мағлубиятга қарамай, Флик бу натижа мавсум давомида амалга оширилган ишларга соя солмаслигини таъкидлади, чунки каталонияликлар чемпионликни муддатидан аввал қўлга киритиб бўлган эди.
"Бу мағлубият чемпионлик билан якунланган мавсумимизга таъсир қилмайди. Валенсиянинг ғалабаси ҳақли эди, чунки уларда мотивация юқорироқ эди. Биз 0:1 ҳисобидан кейин оддий хатоларга йўл қўйдик ва рақиб улардан унумли фойдаланди", — дея қўшимча қилди немис мутахассиси.
Шунингдек, Флик олдинда турган Жаҳон чемпионати футболчиларнинг ўйинига таъсир қилган бўлиши мумкинлигини тан олди. Унинг сўзларига кўра, кўплаб ўйинчилар аллақачон халқаро турнир ҳақида ўйлай бошлаган ва бу руҳий ҳолат сўнгги турдаги хатоларга сабаб бўлган бўлиши мумкин.
“Zamin”ни Telegram'да ўқинг!
