JSTning rasmiy vakili tibbiy niqobning o‘zi koronavirusdan himoya qilolmasligini aytdi

^{Foto: Reuters}
Sog‘lom odamlar niqob taqishi shart emas va niqobning o‘zi koronavirusdan himoyalashni kafolatlamaydi. «RIA Novosti»ning yozishicha, bu haqda Jahon sog‘liqni saqlash tashkilotining rasmiy vakili Tarik Yazarevich ma’lum qilgan.

«Bizning bu boradagi fikrimiz o‘zgarmadi. Sog‘lom odamlarning tibbiy niqob taqishi talab etilmaydi. Kasallik alomatlari bo‘lganlar esa boshqalarni himoya qilish uchun niqob taqishi kerak. Shuningdek, bemorlarga qarayotganlarning barchasi kasallik yuqtirib olmasligi uchun tibbiy niqob taqishi shart», — degan u.

JSST vakilining ta’kidlashicha, tibbiy niqobning o‘zi koronavirusdan himoya qilishni kafolatlamaydi.
«U boshqa choralar bilan birgalikda qo‘llanilishi lozim. Muammo shundaki, niqob taqqan odamlarda himoyalanganlikning yolg‘on hissi paydo bo‘lib, qo‘lni yuvish kabi boshqa narsalarni unutishi mumkin. Shuningdek, niqobni to‘g‘ri taqishni bilmasangiz, yuzingizga odatdagidan ham ko‘proq tegishni boshlaysiz», — deya qo‘shimcha qilgan u.

Uning ta’kidlashicha, butun dunyodagi shifokorlar va tibbiyot xodimlari birinchi navbatda yetarli darajada barcha himoya vositalariga ega bo‘lishi lozim. Buning uchun esa ularning oddiy odamlar tomonidan ommaviy sotib olinishini cheklash lozim.

Eslatib o‘tamiz, O‘zbekistonda 25 martdan boshlab jamoat joylarida niqobsiz yurish taqiqlangan. Niqobsiz yurgan shaxslar jarimaga tortiladi. “Zamin” yangiliklarini “Vkontakti”da kuzatib boring