08:00 / 16.05.2021
2 107

Xitoy marsoxodi ilk bor Marsga qo‘ndi (video)


Foto: imago images
Xitoyning «Chjunchjun» marsoxodi «Tyanven-1» kosmik apparati bilan 15 may kuni ertalab Marsga muvaffaqiyatli qo‘ndi. Bu haqda Xitoy milliy kosmik boshqarmasiga asoslanib, «Interfaks» xabar berdi.

Bu Xitoyning boshqa bir sayyoraga qo‘ngan birinchi marsoxodi. «Tyanven-1» 2020 yil 23 iyulda Xitoy janubidagi Venchan kosmodromidan uchirilgan edi.

Kosmik apparat qariyb yetti oylik parvozdan so‘ng fevral oyida Mars orbitasiga kirgan va ikki oydan ko‘proq vaqt davomida potensial qo‘nish joyini qidirgan.

Rover faoliyatining rejalashtirilgan umri — Mars kuni bo‘yicha 90 kun, bu Yer kunlaridan 2,7 foiz ko‘proq. U to‘rtta quyosh batareyasi bilan ishlaydi. Xitoy roverining harakat tezligi soatiga 200 metrga yetadi.

Xitoy roverida navigatsiya va topografik geodeziya uchun multispektral kameralar, Marsning 10 metr chuqurlikkacha bo‘lgan geologik tuzilishini o‘rganish uchun yerosti tovushli radarlari, tuproqning kimyoviy tarkibini tahlil qilish va biomolekulalarni qidirish uchun asbob, shuningdek, magnit bilan jihozlangan dala detektorlari va ob-havo stansiyasi mavjud.

Kutilganidek, marsoxod sayyorani o‘rganish bo‘yicha dastlabki ma’lumotlarni joriy yildayoq uzatishi mumkin.
Xitoy sovet ittifoqi va AQSHdan so‘ng qizil sayyoraga o‘z marsoxodini qo‘ndirgan uchinchi mamlakat bo‘ldi.
Xitoy prezidenti Si Szinpin Xitoy aerokosmik sanoati vakillarini «Tyanven-1» kosmik apparatining Marsga muvaffaqiyatli qo‘ngani bilan tabrikladi.

«Xitoy Kommunistik partiyasining yuz yilligida ‘Tyanven-1’ missiyasi Marsga muvaffaqiyatli qo‘ndi. Shu munosabat bilan partiya Markaziy qo‘mitasi, Davlat kengashi va XXR Markaziy harbiy komissiyasi nomidan men sizni samimiy tabriklayman», —  deyiladi prezidentning telegrammasida.

Davlat rahbarining ta’kidlashicha, qurilmaning Marsga muvaffaqiyatli qo‘nishi XXR sayyoralararo tadqiqotida yangi bosqichni boshlab berdi.

«Xitoy birinchi marotaba Marsda o‘z izini qoldirdi, bu milliy aerokosmik dasturni ishlab chiqishda muhim va qimmatli yangi bosqichga aylandi. Siz ushbu qiyinchiliklarni jasorat bilan qabul qildingiz, o‘zingizni ayamadingiz va mamlakatimizni kosmik tadqiqotlar bo‘yicha dunyoda yetakchiga aylantirdingiz. Vataningiz va xalqingiz sizning bu xizmatingizni abadiy yodda saqlaydi», — dedi Si Szinpin.

Davlat va partiya rahbari aerokosmik sanoat vakillari bundan buyon ham kosmik tadqiqotlar sohasida astoydil harakat qilishiga va bundan keyin ham insoniyat taraqqiyotiga hissa qo‘shishiga ishonch bildirdi.

arenda kvartira tashkent


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Dunyo » Xitoy marsoxodi ilk bor Marsga qo‘ndi (video)