Hind kompaniyasi o‘zbek olimlari yaratgan texnologiyani tijoratlashtirish niyatida

Innovatsion rivojlanish vazirligida O‘zbekiston va Hindiston o‘rtasidagi savdo-iqtisodiy munosabatlarni yanada kengaytirish ishlari doirasida Hindistonning “Arvind Limited” tekstil kompaniyasi rahbarlari bilan uchrashuv bo‘lib o‘tdi.

“Arvind Limited” tekstil mahsulotlarini ishlab chiqaruvchi va eksport qiluvchi korxonalar ichida Hindistondagi eng yirik va dunyodagi to‘rtinchi kompaniya hisoblanadi. Yillik pul aylanmasi 2 mlrd. AQSh dollarga teng. Tekstil mahsulotlari ishlab chiqarish bilan bir qatorda kompaniya qishloq xo‘jaligi sohasida ham faoliyat yuritib, telekommunikatsiya, injiniring va ko‘chmas mulk bilan bog‘liq xizmatlar ko‘rsatadi”, - deydi “Arvind Limited” kompaniyasining paxtachilik va agrobiznes bo‘yicha direktori Pragnesh Shax.

Uchrashuvda mamlakatimizda amalga oshirilayotgan yangi iqtisodiy-investitsion siyosat, xorijiy investorlarga yaratilayotgan sharoitlar, shuningdek, tekstil sohasida klaster loyihalarini amalga oshirish imkoniyatlari haqida batafsil ma’lumotlar berildi.

Jumladan, paxta yetishtirish va qayta ishlash hamda tekstil mahsulotlari ishlab chiqaruvchi agro-tekstil klasterini yaratish masalalari muhokama etildi. Shu bilan birga mehmonlarda o‘zbek olimlari tomonidan yaratilgan paxta gen-nokauti texnologiyasi katta qiziqish uyg‘otib, mazkur texnologiyani tijoratlashtirish imkoniyatlarini ko‘rib chiqishlari mumkinligini ma’lum qilishdi.

Manba: “Xalq so‘zi Online” “Zamin” yangiliklarini “Telegram”da kuzatib boring