Prezident stipendiyasini berish tartibiga oʻzgartirish kiritilmoqda

Prezident davlat stipendiyasini berish tartibiga oʻzgartish kiritish taklif qilinmoqda. “Oʻzbekiston Respublikasi prezidentining 1993 yil 5 fevraldagi PF-555-son “Oʻzbekistonning oʻquvchi yoshlarini ragʻbatlantirish choralari toʻgʻrisida”gi farmoniga oʻzgartirish kiritish toʻgʻrisida”gi hujjat loyihasi Normativ-huquqiy hujjatlar loyihalari muhokamasiga qoʻyildi, deb xabar bermoqda Turon24.

Birinchi bandda kiritilayotgan oʻzgarishga koʻra, tadqiqotchilik faoliyatini muvaffaqiyatli amalga oshirayotgan va butun oʻqish davrini aʼlo baholarga oʻqigan oxirgi oʻquv yili talabalari uchun Oʻzbekiston Respublikasi prezidentining Davlat stipendiyalari taʼsis etiladi.

Avvalgi hujjatda sal boshqacharoq edi: “Oxirgi yil oʻqiyotgan talabalar va aspirantlar — butun oʻqish davridagi aʼlochilar hamda tadqiqotchilik faoliyatini muvaffaqiyatli amalga oshirayotganlar uchun Oʻzbekiston Respublikasi prezidentining Davlat stipendiyalari taʼsis qilinsin”.

Shuningdek, yangi hujjatga koʻra, stipendiatlarning soni magistratura mutaxassisliklari boʻyicha 11 ta, bakalavriat taʼlim yoʻnalishlari boʻyicha har bir oliy taʼlim muassasasi uchun bittadan boʻlib, har biri talaba oʻrtacha stipendiyasining uch barobari miqdorida belgilanishi taklif qilingan.

Avvalgi farmonga koʻra, ushbu stipendiyalar soni talabalar uchun har biri talabaning oʻrtacha stipendiyasi miqdoridan uch karra koʻp boʻlgan 10 ta va aspirantlar uchun — har biri aspirant stipendiyasi miqdoridan ikki karra koʻp boʻlgan 5 ta etib belgilangan. “Zamin” yangiliklarini “Odnoklassniki”da kuzatib boring