07:13 / 02.04.2019

Buxoroda Turkiya universiteti filiali va klinikasi ochiladi

Mamlakatga Turkiyaning Sogʻliq bilimlari universiteti rektori, professor Jevdet Erdol boshchiligidagi delegatsiya tashrif buyurdi. 1903 yilda tashkil etilgan mazkur universitet Turkiyadagi yagona ixtisoslashgan tibbiyot universiteti, shuningdek, Yevropaning yetakchi taʼlim muassasalaridan biri hisoblanadi.

Delegatsiyaning Oʻzbekiston sogʻliqni saqlash vaziri Alisher Shodmonov bilan uchrashuvi boʻlib oʻtdi. Mamlakatning tibbiyot oliy oʻquv yurtlari rektorlari ishtirok etgan muloqotda tibbiy taʼlim sohasida aloqalarni yanada kengaytirish va rivojlantirish, hamkorlikda ilmiy-maʼrifiy tadbirlarni oʻtkazish imkoniyatlari muhokama qilindi.

Uchrashuv yakunida Oʻzbekiston tibbiyot oliy oʻquv yurtlari hamda Turkiya Sogʻliq bilimlari universiteti oʻrtasida oʻzaro anglashuv memorandumlari imzolandi. Jumladan, tomonlar bakalavr va magistrantlarning akademik almashinuvini tashkil etish, professor-oʻqituvchilar va doktorantlar uchun malaka oshirish, turk universitetining filiali bazasidagi shifoxonalarda yozgi amaliyot oʻtash va qoʻshma tadqiqot loyihalarini amalga oshirish borasida qator kelishuvlarga erishdi.

Bundan tashqari, 2019/2020 oʻquv yilida Buxoro davlat tibbiyot instituti bazasida Turkiya Sogʻliq bilimlari universiteti qoshidagi Oliy tibbiyot maktabining filialini tashkil etish toʻgʻrisida kelishuvga erishildi. Buxoro davlat tibbiyot instituti hududida mazkur tibbiyot universitetining klinikasi ham ochiladi.

Taʼkidlash joizki, ikki tibbiyot oliy oʻquv yurtlari oʻrtasidagi hamkorlik oʻtgan yildan buyon izchil rivojlanmoqda. Talabalar va oʻqituvchilarning ilmiy almashinuvi borasida faol ish olib borilayotir. Hozirga kelib, ana shu hamkorlik samarasi oʻlaroq Buxoro davlat tibbiyot institutining 40 nafardan ziyod professor-oʻqituvchi va talabalari Turkiyada taʼlim oldi.

Manba: Kun.uz