Qashqadaryoda audiosi tarqab ketgan hokim ishdan olindi

^{Baxtiyor Rajabov / Qashqadaryo viloyati hokimligi axborot xizmati}
Xalq deputatlari Mirishkor tuman Kengashining navbatdan tashqari sessiyasi vaqtida tuman hokimi Baxtiyor Rajabov ishdan olindi. Bu haqdagi ma’lumot Qashqadaryo viloyati hokimligi matbuot xizmati tomonidan tasdiqlandi.

Sessiyada nutq so‘zlagan viloyat hokimi Zoir Mirzayev Baxtiyor Rajabovni xalq bilan hisoblashmaslikda ayblagan.

^{Foto: Qashqadaryo viloyati hokimligi axborot xizmati}
Prezidentning kadrlar bo‘yicha maslahatchisi Sherzod Kudbiyev ham ishtirok etgan yig‘ilishda tumanga yangi rahbar tayinlangan.
Endilikda Mirishkor tumaniga G‘.Begaliyev yangi rahbar etib tayinlangan. U shu vaqtgacha Qarshi tumani hokimi lavozimida ishlab kelayotgandi.

^{G‘ayrat Begaliyev / Qashqadaryo viloyati hokimligi axborot xizmati}
Eslatib o‘tamiz, ijtimoiy tarmoqlarda Qashqadaryo viloyati Mirishkor tumani hokimi Baxtiyor Rajabovga tegishli ekani aytilgan audioyozuvda hokim yig‘ilish ishtirokchilarini pul tushumlarini o‘z vaqtida ta’minlamagani uchun turli so‘zlar bilan haqoratlagani va so‘kkani, shuningdek, ba’zilarni urgani eshitilgan.

Qashqadaryo viloyati hokimligi bu audio bo‘yicha munosabat bildirib, Baxtiyor Rajabov 28 fevral kungi yig‘ilishda qo‘l ostidagilarni haqorat qilganini tasdiqladi, O‘zbekiston Bosh prokuraturasi ham ushbu xabar bo‘yicha munosabat bildirdi.

3 mart kuni Qashqadaryo viloyat hokimligidagi kengaytirilgan yig‘ilish o‘tkazildi va unda viloyat rahbari Zoir Mirzayev Mirishkor tumani hokimi Baxtiyor Rajabovning ijtimoiy tarmoqlarda tarqalgan audiosi bo‘yicha munosabat bildirdi.

«Ish faoliyatimizning ko‘p qismi hokimlar va rahbarlarni tartibga chaqirish bilan o‘tib ketyapti. Mirishkorning zo‘ravon hokimi o‘z xatti-harakati bilan viloyat nomiga dog‘ tushirdi. Biror bir hokimda yaxshi tashabbus ko‘rmaymiz, odamlarning turmush tarzini yaxshilash maqsadida ular taklif ham bermaydi. Afsuski, zamon o‘zgarayotganini siz rahbarlar sezmayapsizlar», degandi u.

Ma’lumot uchun, Baxtiyor Eshtemirovich Rajabov 2018 yilgacha Qashqadaryo viloyatining Koson tumaniga rahbarlik qilgan, 2018 yilning dekabrida ishdan olingan, ammo 2019 yilning martida u Qarshi shahri hokimi o‘rinbosari lavozimiga tayinlangan, ko‘p o‘tmay viloyat hokimining qishloq va suv xo‘jaligi masalalari bo‘yicha o‘rinbosariga aylangan, ammo 2019 yil oktabrida viloyat hokimi Zafar Ro‘ziyev ishdan ketgach, uning o‘rinbosarlari qatorida Baxtiyor Jo‘rayev ham lavozimidan ozod etilgan va Mirishkor tumani hokimi lavozimiga tayinlangandi. O‘shanda Baxtiyor Rajabovga va Xurram Jo‘rayevga O‘zbekiston prezidenti «so‘nggi imkon» berayotgani ta’kidlangandi. “Zamin” yangiliklarini “Facebook”da kuzatib boring