Paxtachidagi oltin konidan 6 tonna ruda toshlarini tashib ketmoqchi bo‘lgan 39 kishi qo‘lga olindi

^{Foto: Milliy gvardiya Qo‘riqlash xizmati}
Samarqand viloyati Paxtachi tumanidagi Qoraqo‘tan koni kareridan tarkibida oltin bo‘lgan ruda toshlarini olib ketmoqchi bo‘lgan shaxslar qo‘lga olindi. Bu haqda Milliy gvardiya Qo‘riqlash xizmati xabar berdi.

Ma’lumotlarga ko‘ra, 7 may kuni Milliy gvardiya va ichki ishlar xodimlari hamkorligida tezkor tadbir o‘tkazilgan. Tadbir davomida kondagi 112-sonli ochiq karerga tushib tekshirilganida 39 nafar fuqaro tomonidan 200 ta polietilen qopga joylangan 6 tonna 610 kilogramm ruda aniqlangan.

^{Foto: Milliy gvardiya Qo‘riqlash xizmati}
Tarkibida oltin moddasi bo‘lishi mumkin bo‘lgan toshlar hamda 10 ta turli rusumdagi avtomobil, 9 dona elektr uzatgich, 10 dona perfarator kabi asboblar daliliy ashyo sifatida olinib, Paxtachi tumani IIBga topshirilgan.

^{Foto: Milliy gvardiya Qo‘riqlash xizmati}
«Hozirda mazkur holat yuzasidan tergovga qadar surishtiruv ishlari olib borilmoqda», — deyiladi xabarda. “Zamin” yangiliklarini “Vkontakti”da kuzatib boring