Shaxsiy avtotransportda boshqa yo‘lovchilar bo‘lmasa, tibbiy niqobsiz harakatlanish mumkin

Agar fuqaro o‘z shaxsiy avtomobilida bir o‘zi boshqa yo‘lovchilarsiz harakatlanayotgan bo‘lsa, mantiqan, u tibbiy niqobsiz harakatlanishi mumkin. Lekin yo‘nalishsiz taksi haydovchilari uchun tibbiy niqob taqish majburiy.

Koronavirusga qarshi kurash shtabi a’zosi Habibullo Oqilov AOKAda o‘tkazilgan brifingda kuchaytirilgan karantin cheklovlari vaqtida tibbiy niqob taqish bo‘yicha savollarga aniqlik kiritdi.

«Tibbiy niqob karantin talablarining eng asosiy talablaridan biri hisoblanadi. Niqobni kasal bo‘lgan bemor boshqalarga yuqtirmaslik uchun, sog‘ bo‘lganlar esa kasalliklardan himoyalanish uchun taqishi zarur.

Shuning uchun agar fuqaro o‘z shaxsiy avtomobilida bir o‘zi boshqa yo‘lovchilarsiz harakatlanayotgan bo‘lsa, mantiqan, u tibbiy niqobsiz harakatlanishi mumkin», dedi Habibullo Oqilov.

Uning qayd etishicha, yo‘nalishsiz taksi haydovchilari uchun tibbiy niqob taqish majburiy. Ularning avtomobil eshiklari va rul tutqichlarini tez-tez dezinfeksiya qilib turishi esa foydali bo‘ladi.

Bundan tashqari, Habibullo Oqilov homilador ayollar uchun koronavirusning salbiy jihatlari to‘g‘risidagi savolga ham izoh berdi.

«Koronavirusning homilador ayollar uchun zarari qay darajada ekani haqida aniq dalillangan ma’lumot yo‘q. Lekin infeksiyalar turidan qat’i nazar, ularning sog‘ligi uchun foydali emasligi barcha shifokorlar tomonidan aytilgan», dedi shtab a’zosi.

Shuningdek, koronavirus simptomlari yengil o‘tayotgan va uyida davolanayotgan bemorlarga tavsiyalar ham berib o‘tildi.

«Avvalo, uyida kuzatuvda bo‘lgan bemorlar o‘zini yaqinlaridan izolyatsiya qilishi lozim. Jismoniy faollik va gigiyena qoidalariga doimiy amal qilishi, bir martalik yoki boshqalardan alohida idish-tovoqlardan foydalanishi kerak.

Ularga qonni suyultiruvchi va immunitetni ko‘taruvchi dori vositalarini profilaktik tarzda iste’mol qilish tavsiya qilinadi. Uyda kuzatuvda qolayotgan bemorlar o‘zlarida hid-ta’m bilish qobiliyatining susayishi yoki tana haroratining ko‘tarilishi kabi holatlarni sezsa, darhol oilaviy shifokoriga murojaat qilishlari kerak», dedi Koronavirusga qarshi kurash shtabi a’zosi.

Eslatib o‘tamiz, Toshkent shahar IIBB iyun oyi boshida yolg‘iz haydovchi mashinada tibbiy niqobsiz harakatlanishi mumkinligini ma’lum qilgandi.
9 iyul kuni AOKAda o‘tkazilgan brifingda Bosh davlat sanitariya inspektori Nurmat Otabekov niqob taqib yurish foydadan xoli bo‘lmasligi, Respublika maxsus komissiyasi qarorlarida «salonning ichidagi haydovchi niqob taqib yurmasa ham bo‘ladi», degan fikr yo‘qligini aytgandi.

Manba: Kun.uz “Zamin” yangiliklarini “Vkontakti”da kuzatib boring