11:26 / 11.07.2020
5 822

Ona qizining nomini bylg‘adi

Ona qizining nomini bylg‘adi
Shakarboy (ismlar o‘zgartirilgan) yashaydigan hudud aholisi uzumchilik bilan, aniqrog‘i mayiz tayyorlash bilan shug‘ullanadi. Asosiy daromadi shundan. Uylarning tomi ham uzum quritishga moslashgan.

Avgust oyida Shakarboy ukasi Esonboy bilan o‘zlarining bog‘idan uzgan uzumlarini quritish maqsadida Shakarboyning uyi tomiga ilib chiqishdi. Oktabr oyida qurigan ma­yizlarni yig‘ishtirib olib, darvozaxonaga to‘kib qo‘yishdi. Endi mayizlarni asta-sekin qayta ishlash, tozalash, sotishga tayyorlash jarayoni boshlanadi.

Bir-ikki kundan keyin Esonboyning o‘g‘li Zokir mayizlarni kimdir o‘g‘irlayotganini sezib qolib, otasiga aytdi.

– Qoplarga solib, omborga kiritib qo‘y, – dedi Esonboy. Zokir mayizlarni 40 kilodan o‘lchab, qoplarga joyladi, jami 52 qop bo‘ldi. Zokir mayizlarni tozalab berish uchun qishloqdoshlariga tarqatdi. 7 ta qopni tozalatish uchun odam topolmay omborda qoldirdi.

Ertasi kuni Esonboy kelib, omborni ko‘zdan kechirdi. O‘g‘lining hisob-kitob daftariga qarab yana bir qop mayiz yo‘qligini ko‘rdi. Shundan so‘ng ular shu kuni Shakarboyning darvozaxona va omboriga kuzatuv kamerasi qo‘ydirishdi.

Halima Shakarboyning yon qo‘shnisi. Ayol qo‘shnisining darvozaxonasida turgan mayizdan xabardor edi. O‘sha kuni yarim kechasi uyg‘onib, qo‘shnisinikiga o‘tdi. Qishloq joylarda hovlilar to‘liq o‘ralmagan, darvozaxonalar ham ochiq holda bo‘ladi. Ayol mayiz borligiga ishonch hosil qildi. Omborning eshigini ham ochib ko‘rmoqchi bo‘ldi. Eshik qulf ekan.

Uyiga qaytib qizi Hanifani uyg‘otdi.

– Tur, qizim, yur, Shakarboynikidan mayiz olamiz. Men ko‘rib keldim, hammasi qotib uxlab yotibdi. Sen ham kamchiliklaringni to‘g‘rilab olasan, – dedi qizini egri yo‘lga boshlagan ona.

Turmushi o‘xshamagan Hanifa ancha paytdan buyon bir bolasi bilan ota uyida edi. Garchi onasining qilmishi to‘g‘ri bo‘lmasa-da unga qarshilik qilmadi.

Ota-ona nafaqat o‘z hurmatini saqlashga, balki farzandlarining sha’niga dog‘ tushirmaslikka, ularning fe’lidagi nuqsonini yashirishga urinadi. Lekin Halimaning harakatlarini ko‘rgan odam besh qo‘l barobar emasligiga yana bir marta amin bo‘ladi.

Hanifa onasiga ergashib, qo‘shnining uyiga bordi. Ular o‘zlari bilan olib kelgan fartuklarni mayizga to‘ldirib qaytishdi. Keyin hech nima bo‘lmaganday uyiga kirib uxlashdi.

Bir necha kundan beri mayizdan kimdir olayotganini sezib, ammo kimligini bilmay yurgan aka-ukalarga bu gal video­kameradagi yozuvlarni ko‘rib, o‘g‘rilarni tanib olish qiyin bo‘lmadi. Ertasi kuni ular holat yuzasidan tegishli joyga arz qilib, videoyozuvni ko‘rsatishdi.

Shu kuni IIB xodimlari Halima va qizini qidirib kelishdi va uylaridan narxi 750 ming so‘m bo‘lgan 50 kg. mayizni hujjatlashtirib olishdi.

Sud sudlanuvchilarga nisbatan hukm o‘qidi. Halimaning qaramog‘ida 4 nafar, Hanifaning 6 oylik farzandi borligini, avval sudlanmagani hamda yetkazilgan zararni qoplaganini inobatga olib, jarima jazosi tayinladi.

Nafsi yo‘lida egrilikdan qaytmaydigan, hatto o‘z bolasini ham bu qing‘irliklarga sherik qiladigan onalarni hech bir bahona bilan oqlab bo‘lmaydi. Halimaning boshida eri, qolaversa og‘ir kunda tashlab qo‘ymaydigan otasi, qarindoshlari bor. Demak, u nochor, och qoladigan ahvolda emasdi. Ayoldagi nafs, qanoatsizlik o‘zi va qizini yomonotliq qildi.

Sanjar KABILOV,
Samarqand viloyati prokurorining katta yordamchisi

Manba: Huquq.uz

arenda kvartira tashkent


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Jamiyat » Ona qizining nomini bylg‘adi