18:03 / 21.07.2020
1 164

Fermer bankka 500 mln. so‘mdan ortiq mablag‘larni qaytarishga majbur bo‘ldi

Fermer bankka 500 mln. so‘mdan ortiq mablag‘larni qaytarishga majbur bo‘ldi
Farg‘ona tumanida faoliyat ko‘rsatuvchi “Vodiy zamin chashmasi” fermer xo‘jaligi 2016 yilda “Asaka banki” Farg‘ona viloyat filialidan 3 yil muddatga 1 mlrd. so‘mga kredit mablag‘larini olib, faoliyatini kengaytirishni o‘z oldiga maqsad qilib qo‘ygan.

Bank kredit foizlarini oldindan hisob-kitob qilmagan shekilli, kredit qarzi va unga hisoblangan foizlarni grafik asosida bankka qaytarishga kelganda majburiyatini bajarishni unutgan. Bank o‘zi harakat qilib ko‘rgan, lekin foydasi bo‘lmagan. Shu sababli, o‘rtaga sud qarori asosida Majburiy ijro byurosi davlat ijrochilari tushishgan.

Fuqarolik ishlari bo‘yicha Farg‘ona tumanlararo sudining 25.11.2019 yildagi qaroriga asosan qo‘zg‘atilgan ijro hujjati bo‘yicha navbatma-navbat bankdan kredit olish uchun garovga qo‘yilgan mol-mulklarni xatlash boshlangan. Bankka “qora”sini ham ko‘rsatmay yurgan fermer unga yaxshilik qilish maqsadida garovga o‘z mulklarini qo‘ygan “Farg‘ona sifatli yo‘l ta’mir servis” MCHJ hamda fuqarolar X.Olimjonova va X.Zikriyayevlarni ham yomon ahvolga solib qo‘ygan.

Garovga qo‘yilgan mulklar xatlana boshlagach, “Vodiy zamin chashmasi” fermer xo‘jaligi mansabdor shaxslarining paytavasiga qurt tushgan ko‘rinadi, ular tomonidan bankka 400 mln. so‘mdan ortiq mablag‘ to‘lab berilgan.

“Farg‘ona sifatli yo‘l ta’mir servis” MCHJ balansida bo‘lgan garovga qo‘yilgan yuk mashinasi xatlangach esa fermer shaxsan Byuroning Farg‘ona tuman bo‘limiga tashrif buyurib eng oxirgi qarzdorlik 70 mln. so‘m hisobidan 7000 AQSH dollari miqdoridagi pul mablag‘larini olib kelib topshirdi va ijro hujjati tamomlandi.

Ha, garovga mulkini qo‘ygan shaxslar “fermer”ni yaxshigina silkigan ko‘rinadi.
Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)