14:53 / 28.08.2020
2 532

Chinozlik Ahmadboyning yordamchisi Murodboyga nisbatan sud hukmi e’lon qilindi

Chinozlik Ahmadboyning yordamchisi Murodboyga nisbatan sud hukmi e’lon qilindi
2015 yilga qadar chinozlik Ahmadboyning yordamchilaridan bo‘lgan va xalq orasida Murodboy nomi bilan tanilgan Mirzamurod Yunusaliyev va uning jinoiy sheriklariga nisbatan sud hukmi o‘qildi. Bu haqda «Kun.uz» xabar bergan.

Mirzamurod Yunusaliyev 27 avgust kuni jinoyat ishlari bo‘yicha Yangiyo‘l tuman sudi tomonidan Jinoyat kodeksining 168-moddasi 3-qismining «a», «v» bandlari (firibgarlik), 184-moddasining 3-qismi (juda ko‘p miqdordagi soliqlar yoki boshqa majburiy to‘lovlarni to‘lashdan bo‘yin tovlash), 228-moddasining 3-qismi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish — hujjatning qalbaki ekanligini bila turib, undan foydalanish) va 243-moddalarida (jinoiy faoliyatdan olingan daromadlarni legallashtirish) nazarda tutilgan jinoyatlarni sodir etganlikda aybli deb topildi.

Sud jinoiy guruh rahbari bo‘lgan Mirzamurod Yunusaliyevga – 9 yil, uning sheriklari G‘ofurjon Murodjonovga – 8 yil, Amiran Qudratovga – 8 yil, Erkin Sharipovga – 8 yil, Sirojiddin Yo‘lchiyevga – 6 yil muddatga ozodlikdan mahrum qilish jazosini tayinlagan.

Guruhning qolgan 8 nafar a’zosi Jinoyat kodeksining 72-moddasiga (shartli hukm qilish) asosan ularning guruhdagi ishtirokchilik darajasi inobatga olinib, tayinlangan ozodlikdan mahrum qilish jazosidan shartli ravishda ozod qilinib, 3 yil sinov muddati belgilandi.

Eslatib o‘tamiz, 2017 yil may oyidan qidiruvda bo‘lgan Yunusaliyev 2019 yil 27 aprel kuni qo‘lga olingan. U qidiruvdaligi bois harakatdan to‘xtatib qo‘yilgan jinoyat ishi qayta tiklangandi.

Tergov jarayonida Mirzamurod Yunusaliyev 2016 yil yanvar oyida «Erkin Avto Diler» nomli MCHJ zamirida «moliyaviy piramida» tashkil etib, bu ishga o‘zining o‘nga yaqin jinoiy sheriklarini jalb qilgani, ular yordamida 4000 nafarga yaqin fuqaroning 26 million 870 ming 51 AQSH dollari va 18 milliard so‘m miqdordagi pul va boshqa mol-mulklarini firibgarlik yo‘li bilan qo‘lga kiritgani aniqlangan.

Jinoyat ishi bo‘yicha qariyb 8 milliard so‘mlik 18 ta ko‘chmas mulk ob’ektlari (uy, choyxona, do‘kon binosi, noturar bino va inshootlar) xatlangan. Fuqarolarga tegishli 85 ta yengil mashina ashyoviy dalil tariqasida olingan. Ushbu avtomobillarning barchasi belgilangan tartibda baholanib, o‘z egalariga qaytarilgan.
Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)