08:08 / 21.10.2020
1 138

Endilikda shifokor qabuliga kirish uchun navbatga turishga hojat yo‘q

Endilikda shifokor qabuliga kirish uchun navbatga turishga hojat yo‘q
Shifokor qabuliga yozilish uchun qulay vaqt ajratish, darsdan yoki ishdan ruxsat olish, poliklinikaga borish, mutaxassis tanlash va qulay vaqt uchun talon olish kerak bo‘ladi. Ushbu jarayon ko‘p vaqt va kuch sarflashni talab qiladi. Shu sababli aksariyat odamlar malakali mutaxassislardan yordam so‘rashni orqaga cho‘zib kelaveradilar, bu esa salomatlikka salbiy ta’sir ko‘rsatadi.

Ushbu jarayonni tarixga aylantirish mumkin! Endi shifokor qabuliga kirish uchun navbatda turishning hojati yo‘q. Buning uchun Sog‘liqni saqlash vazirligining Axborot-kommunikatsiya texnologiyalarini rivojlantirish markazi tomonidan internet tarmog‘i orqali yagona ro‘yxatdan o‘tish va shifokor qabuliga yozilish imkoniyatini beruvchi «Elektron poliklinika» tizimi ishlab chiqilgan va joriy etilgan. Ya’ni http://reg.minzdrav.uz/ sayti orqali shifokor qabuliga onlayn yozilish imkoniyati mavjud.

Ushbu tizim yordamida fuqarolar o‘zlari uchun qulay vaqtda, uydan chiqmagan holda shifokor qabuliga yozilishlari, shifokor va muassasa haqida ma’lumotlar olishlari, shuningdek, olingan tibbiy xizmatlar sifatini baholashlari mumkin bo‘ladi. Poliklinikalar uchun ushbu tizimning afzalliklari – ma’lumotlarni avtomatlashtirilgan ro‘yxatdan o‘tkazish, oilaviy poliklinikalarda yagona elektron ambulatoriya tibbiy kartasini yuritish imkoniyatidir.

Bugungi kunda «Elektron poliklinika» axborot tizimiga Toshkent shahri va viloyatlardagi ko‘plab oilaviy poliklinikalar ulangan bo‘lib, butun respublika hududi bo‘ylab poliklinikalarni tizimga ulash ishlari davom ettirib kelinmoqda.

Vaqtingizni tejang, navbat kutib o‘tirmang, http://reg.minzdrav.uz/ veb-sayti orqali poliklinikangizdagi shifokor qabuliga onlayn tarzda yoziling. Salomatligingiz o‘z qo‘lingizda!
Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)