20:10 / 11.05.2021
3 812

Karimov va Mirziyoyev siyosati, grin karta va AQSH vizasi muammolari... Amerika elchisi bilan intervyu


Foto: «Xabar.uz»
«Xabar.uz» sayti Amerika Qo‘shma Shtatlarining O‘zbekistondagi favqulotda va muxtor elchisi janob Deniyel Rozenblyum bilan intervyu uyushtirdi.

— Assalomu alaykum, janob elchi. Biz bilan uchrashishga rozi bo‘lganingiz uchun tashakkur.
— Eng avvalo, bugungi suhbatni uyushtirganingiz uchun sizga rahmat. Siz bilan uchrashib, savollaringizga javob berishdan mamnunman.

— 35 yillik ish tajribasiga egasiz. Bu davrda ko‘plab davlatlarning rivojlanish jarayonlarini kuzatgansiz. O‘zbekistonning yangi davri ramziy ma’noda ikkiga bo‘linadi: Karimov prezidentligidagi mustaqillikning dastlabki 25 yili va undan keyingi davr. Sizningcha, bugungi kunda O‘zbekistonda nimalar o‘zgargan?
— O‘ylaymanki, birinchi davrga qaraganda prezident Mirziyeyov ba’zi narsalarni sezilarli darajada o‘zgartirdi. Birinchi navbatda, tashqi siyosatdagi munosabatlarni e’tirof etishimiz lozim. «Yaxshi qo‘shnichilik birinchi o‘rinda» degan siyosat buning yaqqol namunasidir. O‘zbekistonda qo‘shnilar bilan aloqalarni mustahkamlashga e’tibor ustuvor vazifa sifatida belgilandi. Misol uchun, yaqindagina O‘zbekistonning Qirg‘iziston bilan chegara hududlarini demarkatsiya qilish masalasi yoki ikki mamlakat xalqlarini bog‘lovchi yangi yo‘llarning ochilishi va hokazo.

Yana savdo-sotiqning rivojlanishi, murakkab masalalarni hal qilish, avvalgi muammolarni isloh qilish, chegaralararo suv muammosini yechish ham so‘nggi paytlarda jadallashdi. Prezident Mirziyoyev shu ma’noda tashqi siyosatda muhim o‘zgarishlar qildi. Ichki siyosat, iqtisod, ijtimoiy soha, siyosiy masalalarda ham katta maqsadli islohotlarga qo‘l urildi.

Shavkat Mirziyoyevning iqtisodni modernizatsiyalashtirishi, fuqarolar va hukumat o‘rtasidagi munosabatni o‘zgartirishga oid islohotlari ham e’tirofga sazovordir. Uning «aholi hayotini yaxshilash uchun xalq davlatga emas, davlat xalqqa xizmat qilishi kerak», degan gaplari ham menda shaxsan qiziqish uyg‘otdi. Bu borada munosabat va o‘zaro aloqa o‘zgarmoqda. Albatta, bu tashabbuslarning hammasi ham hali muvaffaqiyatli bo‘lmayotganini davlat rahbarining o‘zi ham tan olayapti, ammo islohotlar jarayoni davom etmoqda. O‘zbekiston tarixidagi avvalgi davrlarga qaraganda o‘zgarishlar ana shularda ko‘rinadi.  

— Sizningcha, Karimov diktator edimi?
— Uning (Islom Karimov nazarda tutilyapti – tahrir) boshqaruv usuli prezident Mirziyoyevnikidan boshqacha edi. Karimov davridagi tuzumning tashqi siyosat hamda davlat va fuqarolar o‘rtasidagi munosabat masalasida boshqacha yondashuv mavjud edi. Shaxsan kamina AQSH hukumati vakili sifatida munosabatlarimiz tarixida o‘zaro mushtarak manfaatlarni hatto prezident Karimov davrida ham topa olganmiz. Ammo bir qator umumiy manfaatlar va ularni yuqori bosiqchga ko‘tarish salohiyati o‘tgan to‘rt yil davomida sezilarli darajada o‘sdi.

— Amerika Qo‘shma Shtatlari o‘zini butun dunyo bo‘ylab demokratiyani targ‘ib qiluvchi davlat sifatida ko‘rsatadi, ammo «The Economist Intelligence Unit»ning demokratiya indeksida AQSH to‘liq demokratik mamlakat sifatida tan olinmagan va u 25-o‘rinni egallab turibdi. AQSH nega bunday pog‘onada qolmoqda? O‘zbekistondagi demokratiyani qanday baholaysiz?
— Savolingizning AQSHga taalluqli birinchi qismiga avval javob bersam: ta’kidlaganimdek, biz hamisha demokratiya jarayoniga evolyutsiya sifatida qaraganmiz.

Demokratiyaning ko‘zlagan oxirgi manzili yo‘q: siz har doim uni rivojlantirish va kamolotga yetkazish uchun mehnat qilasiz. Konstitutsiyamizni yozganlarning aytishiga qaraganda, ular komil ittifoq tuzish uchun demokratiyani yanada komilroq qilishga urinishgan, ammo u hech qachon tamoman komil bo‘lmasligini anglashgan.

Biz doim o‘z demokratiyamizni takomillashtirib boramiz. Noyabr oyida saylanganidan buyon prezident Bayden tez-tez takrorlayotganidek, u Amerika demokratiyasini mamlakat ichida mustahkamlashni o‘zining ustuvor vazifalaridan biri deb biladi. Janob Bayden mamlakat ichidagi demokratiyaga asosiy e’tiborni qaratish kerak, deb hisoblaydi. Siz aytayotgan spetsifik ko‘rsatkichlar haqida ko‘p ham ma’lumotga emasman, ammo men biz hamisha demokratiyamizni rivojlantirib borishimiz kerakligini e’tirof etaman.

O‘zbekiston va uning demokratiyasi haqida gapiradigan bo‘lsam, menimcha, mamlakat o‘z evolyutsiyasi, o‘z yo‘nalishi bo‘yicha bormoqda. Yuqori doiralarda, shu jumladan, prezident Mirziyoyev e’tirof etayotgani kabi, hali bu borada ko‘p ishlar qilinishi lozim. Biz hukumat va fuqarolik jamiyati guruhlari hamda NNTlar bilan demokratiya sohasidagi ba’zi isohotlar bo‘yicha birgalikda ishlash imkoniga ega bo‘lganimizdan xursandmiz. Ishonamanki, bu yo‘lda oldinga siljishlar va o‘sish bo‘ldi, ammo hali bu borada qiladigan ishlarimiz ko‘p. Men o‘zbek mulozimlari ham aytayotgan narsalarni qaytaryapman.   

— 2020 yil 3 noyabrda, og‘ir pandemiya sharoitida AQSHda prezident saylovlari bo‘lib o‘tdi. Noyabr oyidagi saylovlardan so‘ng turli xil tartibsizliklar boshlandi. Sizningcha, bunday namoyishlar so‘z erkinligimi yoki…
— So‘z erkinligi va o‘z fikrini bildirgan holda tinch namoyishga chiqish huquqi istalgan demokratik jamiyatning asosiy prinsiplaridan sanaladi. Biroq, zo‘ravonlik va kuch ishlatishni qabul qilib bo‘lmaydi va u qonunga xilofdir. Bu AQSHda ham, O‘zbekistonda ham shunday.

Ba’zan odamlar bu boradagi chegara qayerda ekanini bilishga qiynalishadi, ya’ni o‘z fikringizni bildirish qandaydir noqonuniy narsani keltirib chiqarishi mumkinligini hisobga olishmaydi. AQSHda bu borada ancha aniq mezonlar belgilab qo‘yilgan. Siz ifoda etayotgan narsa odamlarning mulkiga tajovuz qilmasa yo jamiyatda tartibsizlik keltirib chiqarmasa, bunday so‘z erkinligi himoya qilinadi. Ammo o‘sha chegara bosib o‘tilsa, huquqni muhofaza qilish idoralari chora ko‘rishiga to‘g‘ri keladi.

Shu narsa 6 yanvardagi isyonlarda, ya’ni Kapitoliyga qilingan hujumlarda ko‘zga tashlandiki, u so‘z erkinligini namoyish qilish emasdi. Balki xabaringiz bordir, unda ishtirok etgan odamlarning ko‘pi hibsga olindi, javobgarlikka tortildi. Ba’zilariga ko‘p muddatli qamoq jazosi tayinlandi, chunki bu so‘z erkinligi emasdi.

— Jozef Baydenning prezidentligi boshlanganiga ko‘p bo‘lmadi. Yangi prezident davrida AQSH-O‘zbekiston munosabatlarida qanday o‘zgarishlar kutilmoqda?
— Shu kunlarda bu savolni menga juda ko‘p berishmoqda. Ko‘pchilik Bayden ma’muriyati paytida qandaydir o‘zgarishlar bo‘ladimi, deb qiziqmoqda.

Men o‘zaro munosabatlarimizda katta o‘zgarishlar bo‘ladi, deb o‘ylamayman. Mehnat faoliyatim davomida bir necha prezidentlik davrini ko‘rganman. Davlat departamentidagi faoliyatimni 90-yillarda, prezident Klinton davrida boshlaganman. So‘ng prezident Bush, Obama, Tramp va mana endi Bayden davrida ham ishlayapman. Markaziy Osiyo va Yevroosiyoning boshqa qismlarida AQSH siyosati o‘sha barcha prezidentlik davrlarida izchil bo‘lgan. Bu mintaqa davlatlari, jumladan, O‘zbekiston suverenitetini qo‘llab-quvvatlash siyosati, davlatlar, jumladan, O‘zbekiston mustaqilligini, barqarorligini mustahkamlash, mintaqada farovonlikka erishish... va bu qariyb 30 yildan buyon davom etmoqda.

Prezident Bayden davrida bu ishlar yana o‘shanday davom etadi, deb o‘ylayman. Uning ma’muriyati iqlim o‘zgarishlariga usutvor vazifa deb qaramoqda. Bu — O‘zbekiston bilan muloqotimizning ham bir qismi bo‘ladi, degan fikrdaman.

— Sizning O‘zbekistondagi elchilik missiyangiz AQSHning sobiq prezidenti Donald Tramp davrida boshlanganini bilamiz. Yangi prezident ma’muriyati ham sizga ishonch bildirishda davom etadimi?
— Kamina martabadagi xodimlar qatorida turaman, ya’ni davlat departamenti xodimiman. U yerda qariyb 25 yildan buyon ishlamoqdaman. Davlat departamenti xodimi bo‘lgan elchilardan ma’muriyat o‘zgarganda ham deyarli doim o‘z lavozimlarida qolishlari so‘raladi. Ha, 99 foiz hollarda shunday. Prezident Bayden yanvar oyida lavozimga o‘tirganidan buyon shuni ko‘rmoqdamanki, mendan ham elchilikda qolish so‘raladi, buni so‘rashdi ham. O‘ylaymanki, ma’muriyat o‘zgargani bilan bu yerdagi lavozimim o‘zgarmaydi.

— O‘zbekiston Green Card yoki «Diversity Immigrant Visa» dasturiga da’vogarlar soni bo‘yicha Ganadan keyin ikkinchi o‘rinda turadi. Shuningdek, o‘zbeklar AQSH viza dasturiga o‘qish, ishlash va sayohat uchun ko‘p murojaat qilishadi. Ammo viza uchun arizalarning 65-70 foizi rad etilishini eshitganmiz. Buning asosiy sababi nima?
— Savolingizning birinchi qismi bo‘yicha javob beradigan bo‘lsam, men bu yerda odamlarning grin karta o‘ynashga qiziqishi yuqori bo‘lishiga nima sabab ekani haqida taxminiy gap aytmagan bo‘lardim.

Butun dunyo bo‘ylab odamlar grin kartaga hujjat topshirishadi. Bu savolni balki o‘zbekistonliklardan so‘rash kerakdir.
Savolning ikkinchi qismi, ya’ni viza so‘rovnomalariga rad javob berilishi haqida shuni aytishim mumkinki, viza tizimida viza olgan kishilarning qancha foizi muddat tugaganidan keyin ham AQSHda qolib ketganiga e’tibor qaratadi.

Boshqacha qilib aytganda, misol uchun, «Work and Study» maxsus dasturi bo‘yicha 3 oylik viza bilan Amerikaga ketgan kishilar muddat o‘tgandan so‘ng ham u yerda qolib ketadi, ya’ni viza muddatini o‘tkazib yuborishadi. Afsuski, AQSHga borayotgan o‘zbekistonliklar bilan bog‘liq bunday ko‘rsatkich dunyodagi o‘rtacha ko‘rsatkichdan yuqoriroq.

Ochig‘ini aytganda, vizaga ariza beruvchilarning viza olishda mushkulliklarga yo‘liqayotganining asosiy sababi ana shunda. Bu, albatta, keyingi paytlarda vizani rad etish ko‘rsatkichi ham anchagina yuqori bo‘lishiga olib kelmoqda.

O‘tgan yilda esa pandemiya tufayli viza olish imkoni ko‘p bo‘lmadi, ammo 2020 yildan avval vizani rad etish ko‘rsatkichi yuqori edi va biz odamlar viza tugagach, uylariga qaytmasliklaridan xavotirdamiz. O‘ylaymanki, vaqt o‘tishi bilan bu narsalar o‘zgaradi.

— O‘zbekistonliklar orasida AQSH viza berish jarayonida da’vogarning ijtimoiy tarmoqlardagi akkauntlarini tekshiradi degan mish-mishlar bor. Bu qay darajada haqiqat?
— AQSH Davlat departamenti immigratsion vizaga da’vogarlarning ijtimoiy tarmoqlardagi akkauntlari, xavfsizlikni tekshirish jarayonining bir qismi sifatida, shuningdek, noimmigrant toifalar (talaba, turist, almashuv dasturi) uchun ba’zi vizaga murojaat etuvchilarning ijtimoiy tarmoqlardagi akkauntlari to‘g‘risidagi ma’lumotlarni to‘playdi.

— AQSH va O‘zbekiston ta’lim tizimlari o‘rtasida qanday hamkorliklar ko‘zda tutilmoqda? Iqtisodiy sohada-chi?
— Siz hamkorligimizda juda muhim bo‘lgan ikki sohani aytib o‘tdingiz. Eng avvalo, iqtisodiy sohadagi munosabat va hamkorligimiz. Pandemiyadan ilgari biz mamlakatlarimiz o‘rtasidagi o‘zaro savdo aloqalarimizda juda katta o‘sish bo‘lganini kuzatdik.
Menimcha, 2018-2019 yillarda o‘zaro savdo ikki baravardan ko‘proqqa o‘sdi. Agar pandemiya bo‘lmaganida, yanada o‘sishda davom etgan bo‘lardi.

Iqtisod sohasida ko‘p istiqbollar mavjudligini ko‘raman. Biz amerikalik kompaniyalar bu yerdagi imkoniyatlar haqida yetarli ma’lumot olishiga harakat qilyapmiz. Qator vazirliklar, jumladan, Investitsiya va savdo vazirligi va boshqalar bilan, shuningdek mahalliy kompaniyalar bilan birga faoliyat olib bordik. Albatta, hali Amerika kompaniyalari bu yerga oqib kelishiga erishganimizcha yo‘q, ammo muvaffaqiyatli biznes qilayotganlari ham yo‘q emas.

Bir paytning o‘zida biz prezidentning iqtisodga oid islohotlar dasturini qo‘llab-quvvatlayapmiz. Masalan, Investitsiya va tashqi savdo vazirligida bizning bir maslahatchimiz bo‘lib, u O‘zbekistonning Jahon savdo tashkilotiga beradigan arizasi bo‘yicha ko‘maklashmoqda. Hukumatning maqsadi ham JSTga qo‘shilish va bu yo‘lda texnik ko‘mak ko‘rsatmoqdamiz.

Moliya vazirligida ham bizning maslahatchimiz mavjud. U budjet va soliq masalalari bo‘yicha ekspertlik maslahatini berib bormoqda. Biz bu yerdagi iqtisod yanada ochiq, yanada biznes qilishga oson va xalqaro savdo andozalariga javob beradigan bo‘lishiga tilakdoshmiz.

Agar islohotlar muvaffaqiyatli davom etsa, yanada ko‘proq kompaniyalar bu yerga kelib, biznes faoliyati bilan shug‘ullanishlari mumkin. Amerika kompaniyalari ma’lum bir narsalarga, muhitga, masalan, qonun ustuvorligiga, munozaralar adolatli hal etilishiga e’tibor qaratishadi.

Siz eslatgan yana bir hamkorlik sohasi bu – ta’lim tizimidir. Biz Xalq ta’limi vazirligi, Oliy ta’lim vazirligi bilan o‘zaro yaqin munosabatlarni yo‘lga qo‘yganmiz.

Hozir ularning hammasini sanab o‘tirmayman, ammo hamkorlikdagi ba’zi loyihalarni aytib o‘tmoqchiman. Xususan, «English Speaking Countries» tashabbusini qo‘llab-quvvatlamoqdamiz. Uning maqsadi shuki, maktabni tamomlayotgan bitiruvchilar ingliz tilini chuqur o‘zlashtirgan bo‘lishlari kerak. Bu birinchi sinfdan bitiruvchi sinfgacha qamrab olgan bo‘ladi.

Ekspertlarimiz ko‘magida ingliz tili o‘qituvchilariga eng yangi o‘qitish uslublarini o‘rgatish, zamonaviy qo‘llanma va materiallar bilan ta’minlash ustida ishlayapmiz. Bu tashabbusning yana bir qismi shuki, biz amerikalik ingliz tili o‘qituvchilarini bevosita O‘zbekistonda ishlashlari uchun olib kelmoqdamiz. Yanvar oyida 27 nafar o‘qituvchi kelgandi va hozir ular butun mamlakat bo‘ylab yashab, mehnat qilmoqda.

Bir necha hafta avval men ularning uch nafarini Qarshi shahrida uchratdim. Ular bu shaharda keyingi yilgacha qolishadi.
Ta’lim sohasida yana boshqa ko‘plab loyihalarimiz haqida ham ko‘p gapirishim mumkin, shu jumladan, axborot texnologiyalari, o‘qish va matematika yo‘nalishlarida. AQSH ta’lim sohasida ko‘p narsani taklif qila oladi. Yillar davomida biz katta tajriba to‘plaganmiz, ana shularning ba’zilarini O‘zbekiston bilan bo‘lisha olamiz, deb o‘ylayman. Yana bir sabab shuki, mamlakat kelajagi uchun ta’limga qo‘yiladigan sarmoyadan yaxshiroq narsa yo‘q. Prezident va hukumatdagi boshqa mulozimlar bu narsani e’tirof etishmoqda va bu maqsad yo‘lida ko‘mak bera olishimizdan mamnunmiz.   

— Iqtisodiy sohadagi hamkorligimiz haqida yana nimalar deya olasiz?
— Iqtisodiy hamkorligimiz haqida oldinroq ham gapirib o‘tdim. Albatta, iqtisod bizning hamkorligimizdagi ustuvor sohalardan biri. U O‘zbekiston kelajagi uchun o‘ta zarur bo‘lgani uchun ham muhimdir. Shuningdek, AQSHning bunda manfaati bor, ya’ni agar amerikalik kompaniyalar kelib, bu yerda tovarlarini sotsa yo sarmoya kiritsa, buning natijasida Amerikada ham ish o‘rinlari yaratiladi. Shu ma’noda biz iqtisodiy hamkorlikda foyda mavjudligini ko‘ramiz. Albatta, bu yagona va eng muhim ustuvor masala emas, balki hamkorligimizdagi muhim masalarning bir bo‘lagidir. 

— O‘zbekiston boshqa Markaziy Osiyo davlatlariga nisbatan AQSH uchun qanday strategik ahamiyatga ega?
—Men mamlakatlarni solishtirishni yoqtirmayman. Boshqa mamlakatlarda elchi bo‘lib ishlayotgan hamkasblarimni tashvishga solishni istamayman. O‘zbekistondagi AQSH elchisi sifatida aytishim mumkinki, O‘zbekiston mintaqadagi muhim davlatdir. Jiddiy aytsam, O‘zbekiston AQSH uchun muhim mamlakat sanaladi. Bunga hech bo‘lmaganda uchta sababni keltirishim mumkin:
  • Birinchi sabab shuki, biz ushbu mintaqada xavfsizlik va barqarorlik bo‘yicha mushtarak manfaatga egamiz. Markaziy Osiyoda tinchlik va farovonlik bo‘lishi tarafdorimiz. Mintaqa urush, terrorizmdan holi mintaqa bo‘lishini istaymiz. Biz harbiy sohada bo‘ladimi, treninglar o‘tkazishdami, xullas barcha masalalarda birgalikda ish olib boryapmiz. Afg‘onistondagi tinchlik, u yerda osoyishtalik barpo etish jarayonini O‘zbekiston juda yaxshi qo‘llab-quvvatlamoqda. Bu mushtarak manfaatlarimizning birinchisi.
  • Ikkinchisi shuki, har ikki mamlakat uchun foydali bo‘lgan iqtisodiy hamkorlik. Agar biz islohotlarni muvaffaqiyatli bo‘lishida yordam bersak, bundan O‘zbekiston foyda ko‘radi, iqtisodi ochiq va yaxshiroq ishlaydi. Bu AQSH uchun ham foydalidir, chunki kompaniyalar bu yerga kelib, pul ishlashlari mumkin, ya’ni har ikki tomonga ham foyda.
  • Uchinchi soha shuki, odamlar ba’zan uni yaxshi tushuna olmaydi. Bu — gumanitar hamkorlik, odamlar va xalqlar o‘rtasidagi o‘zaro hamkorlikdir. Masalan, ikki mamlakat universitetlarining o‘zaro hamkorligi va yoki mushtarak qadriyatlarga bo‘lgan ishonch. Shu bois biz hukumat bilan juda yaqindan ish olib boryapmiz. Mehnat masalasi bo‘ladimi, yoki paxta va majburiy mehnat bo‘ladimi, O‘zbekiston hukumati bu boradagi tanglikni qisqartirishni istaydi. Masalan, majburiy mehnat masalasida, u xalqaro hamjamiyatdan yordam so‘raydi va biz uning bir bo‘lagimiz. Odamlar o‘rtasidagi aloqalar ham mushtarak maqsadlarimizda juda muhimdir.

— Bilishimizcha, siz sovetshunoslik bo‘yicha ham mutaxassis hisoblanasiz. Boshqa sobiq ittifoq davlatlari orasida O‘zbekiston qanday imkoniyatlarga ega edi va bugungi kunda ulardan qanday foydalangan?
— O‘zbekiston har doim unikal imkoniyatlarga ega bo‘lgan. Bunga uning joylashish o‘rni, tabiiy boyliklari ham sabab. U Markaziy Osiyo markazida joylashgan, boshqa qo‘shni mamlakatlar, jumladan Afg‘oniston bilan chegaradosh. Uning hududi katta, boy resurlari, mineral boyliklari, nefti, gazi va boshqa tabiiy resurlari mavjud. Ammo, eng muhimi inson resuri, desam adashmayman.

Mamlakat aholisi savodli, boy madaniyat va chuqur an’nalarga ega, tarix davomida qator yutuqlarga erishgan. Ishonamanki, hozir avvalgidan ham ko‘ra kattaroq imkoniyatlar mavjud. Bu yerdagi yoshlar soni jud ko‘p. Statistika qarasak, aholining 64 foizi 30 yoshdan yosh. Bu o‘ziga xos muammolarni ham keltirib chiqaradi. O‘zbekiston ularni ish bilan ta’minlashi, o‘qitishi, ta’limga alohida urg‘u berishi kerak. Yoshlarning salohiyati va bilimlari ijobiy narsalarga aylanishi mumkin. Masalan, O‘zbekiston taraqqiyoti uchun yangi bizneslar, startaplar ochish, axborot texnologiyalari bo‘yicha ishlash kabi sohalarda yoshlarning ulushi katta bo‘lishi lozim. Menimcha, biz tilga olgan islohotlar muvaffaqiyatli bo‘lsa, O‘zbekistonning kelajagi yorqin bo‘ladi.

— Xabaringiz bor, 2021 yilning oktabr oyida O‘zbekistonda prezident saylovlari bo‘lib o‘tadi. Siz ilgari ham O‘zbekistonda bo‘lib o‘tgan saylovlardan biriga guvoh bo‘lgansiz.
— Saylovlar erkin, adolatli va raqobatdosh bo‘lishi chindan demokratik jamiyat belgilaridan sanaladi. Demokratiya hamisha rivojlanib turadigan jarayon, evolyutsiya, va saylovlar uning muhim bir qismidir. U orqali xalqlar o‘z rahbarlarini saylaydilar.

Saylovlar adolatli tashkil etilishi, unda raqobatlashmoqchi bo‘lganlarga imkon va barcha sharoitlar bo‘lishi juda muhim. Agar kimdir siyosiy partiya tuzmoqchi bo‘lsa, uning yo‘liga qo‘yiladigan to‘siqlar bo‘lmasligi kerak.

Shuni bilamanki, kelayotgan saylovlarda O‘zbekistonda xalqaro hamjamiyat ham ishtirok etadi. AQSH YEXHT monitoring ishida qatnashadi va saylovlarni yaqindan kuzatib boradi. Biz Markaziy saylov komissiyasiga saylovlarni o‘tkazishda texnik ko‘mak berish niyatidamiz va jarayonni yaqindan kuzatib boramiz. Demokratiya bir evolyutsiya demakdir va u to‘g‘ri yo‘nalishga ega bo‘lmog‘i muhimdir. Biz buni O‘zbekistondan kutib qolamiz.

Yuqorida ta’lim haqidagi savolingizga javob berishda bir narsani unutibman. Ikki hafta avval Qashqadaryoga bordim (menimcha, u siz tug‘ilgan maskan, shundaymi?), u yerga birinchi tashrifim edi. Menga juda yoqdi. Biz u yerda «Amerika burchagi» tashkil etdik. U «Barkamol avlod» markazida joylashgan. U yerga yoshlar, kattalar borib, AQSH haqida ma’lumot olishlari, Amerikada o‘qish imkoniyatlarini bilib olishlari va ingliz tili o‘rganishlari mumkin. Men o‘sha markazni ochishdan juda xursand bo‘ldim. Biz O‘zbekiston bo‘ylab shunga o‘xshash yana 6 ta markaz ochish niyatidamiz.

— Suhbat uchun rahmat! Sog‘ bo‘ling!         
— Tashakkur.
Sanjar Mashriqiy suhbatlashdi

arenda kvartira tashkent


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Jamiyat » Karimov va Mirziyoyev siyosati, grin karta va AQSH vizasi muammolari... Amerika elchisi bilan intervyu