Harry Kane tomonidan amalga oshirilgan ajoyib xet-trik Bavariya jamoasiga Shtutgart ustidan 3:0 hisobida gʻalaba qozonish imkonini berdi. Ushbu gʻalaba orqali Myunxen klubi Germaniya kubogi sohibiga aylandi va mavsumdagi ichki dublni rasmiylashtirdi. Vincent Kompany Angliya terma jamoasi sardorining navbatdagi hal qiluvchi oʻyinidan soʻng uning mahorati va ruhiyatini yuqori baholadi. Bu haqda Goal.com xabar beradi.
Uchrashuvning birinchi boʻlimi ancha muvozanatli oʻtdi va Kompany Shtutgart oʻyin boshida uning jamoasiga muammolar tugʻdirganini tan oldi. Bavariya vakillari yakkama-yakka vaziyatlarda toʻgʻri qaror qabul qilishga qiynalishdi, biroq murabbiyning soʻzlariga koʻra, futbolchilar tanaffus vaqtida oʻzlariga boʻlgan ishonchni yoʻqotishmagan. Ikkinchi boʻlimda shiddat oshirildi va boʻsh hududlardan samarali foydalanildi.
Kane yana bir bor oʻzining Bavariya uchun naqadar muhimligini isbotladi, biroq Kompany hujumchining taʼsiri faqat gollar bilan cheklanmasligini taʼkidladi. Belgiya mutaxassisi hujumchining kamtarligi va jamoa uchun fidoyiligini alohida eʼtirof etdi. "Gap faqat uning sifatlarida emas. U hatto burchak bayrogʻi yonida ham toʻp uchun kurashadi. Qanday qilib shuncha gol urib, oddiy yigit boʻlib qolish mumkinligini tushunmayman", — dedi murabbiy.
Kompany Bavariya kuchli raqibga qarshi qiyin boshlangan oʻyinda munosib javob qaytarganidan mamnunligini bildirdi. Uning soʻzlariga koʻra, jamoa ikkinchi boʻlimda darajasini oshirishga muvaffaq boʻlgan va deyarli mukammal final oʻyinini oʻtkazgan. Ushbu gʻalaba Vincent Kompany uchun Germaniya kubogidagi ilk sovrin boʻldi.
“Zamin”ni Telegramʻda oʻqing!
