Mirjalol Qosimov jahon chempionatida kimga muxlislik qilishi haqida

Foto: Sputnik
O‘zbekistonlik mashhur futbolchi, bugungi kunda "Bunyodkor" futbol klubi bosh murabbiyi Mirjalol Qosimov Sputnik muxbiri bilan suhbatda O‘zbekiston terma jamoasining mundial yo‘lidagi omadsizligi, kechagi va bugungi futbol, Rossiyada bo‘lib o‘tadigan jahon chempionatida kimga muxlislik qilishi haqida so‘zlab berdi.

- Sizningcha, O‘zbekiston terma jamoasiga mundialga chiqishi uchun nima yetishmadi?
— To‘g‘risini aytsam, bilmayman. Menimcha, omad yetishmadi. Jahon chempionatiga chiqishni barcha — ishqibozlar, butun xalqimiz, rahbariyat, futbolchilar va murabbiylar istagandi. Bu yilgi mundialga chiqish uchun imkoniyatlar bo‘ldi, harakat qilindi, ammo omad yetishmadi. Menimcha, har qanday ishda omad ham albatta yonma yon yurishi kerak.

Hamma narsa o‘tib bo‘ldi, endi ortga qaramasdan, kelajakka boqish kerak. Xatolardan to‘g‘ri xulosa chiqarib, keyingi chempionatga chiqish uchun tayyorgarlik ko‘rish kerak.

- Bu yilgi jahon chempionatida kimga muxlislik qilasiz va qaysi jamoalarni favorit deb hisoblaysiz?
— Jahon chempionatida birinchi navbatda mashhur hakamimiz, do‘stimiz Ravshan Ermatovga muxlislik qilaman. Bu yilgi chempionatda ham uning boshchiligidagi guruh ishtirok etadi, Ermatov jahon chempionatlarida hakamlik qilish bo‘yicha rekordchi.

Favoritlarga kelsak, oldindan fol ochishni yoqtirmayman. Mundialda kuchli jamoalar yig‘ilgan, bu bosqichga qadar ular mashaqqatli yo‘lni bosib kelishgan. Ular orasida Argentina, Braziliya, Ispaniya terma jamoalari kuchli sanaladi. Germaniya ham jismoniy jihatdan kuchli o‘yin ko‘rsatadi. Ammo fol ochishni yoqtirmayman.

- Chempionatdagi biror uchrashuvni stadiondan bevosita ko‘rish niyatingiz bormi yoki televizor orqali tomosha qilasizmi?
— Borib, stadiondan tomosha qilishni istardim. Chunki stadionda ko‘rsangiz muhit butunlay boshqacha bo‘ladi. O‘tgan safargi jahon chempionatida Germaniya va Argentina o‘rtasidagi final o‘yinini stadionda tomosha qilgandim. Bu yil aniq ayta olmayman. Bizda tanaffus bo‘ladi, keyingi davraga tayyorgarlik qilamiz, yig‘inlarda bo‘lamiz. Televizor orqali ko‘raman deb o‘ylayman.

- Sizningcha, bugungi va ilgarigi futbol o‘rtasida farq bormi?
— Bugungi futbol oldingidek emas. Hozirda futbolchi tezkorlik bilan o‘ylashi, qaror chiqarishi kerak, jismoniy jihatlar, jamoaviy o‘yin shakllandi. Butun dunyoda futbol tezlik bilan rivojlanyapti. Shunchaki o‘ynab raqibni yutishning imkoni yo‘q. Futbol avvalgiga nisbatan har tomonlama o‘sdi.

- Nima deb o‘ylaysiz, Rossiya jahon chempionatini yuqori darajada o‘tkazishga qodirmi?
— Shubhasiz, musobaqa zo‘r o‘tadi. Rossiyaning ushbu chempionatga tashkiliy jihatdan qay darajada tayyorlanganini bilib turibmiz. Mazkur chempionatga tashrif buyurgan muxlislar albatta xursand bo‘lishadi.

- Futbolga zamonaviy texnologiyalar — videotakrorlar, golni aniqlash texnologiyalari joriy etilishiga qanday qaraysiz?
— Boya aytganimdek futbol tezlik bilan rivojlanyapti. Hakamlar ham inson. Inson baribir adashishi mumkin. Bir vaziyatga u tomondan qarasangiz boshqacha, bu tomondan qarasangiz boshqacha ko‘rinadi. Masalan, Maradonaning jahon chempionatida qo‘li bilan gol urganini eslang. Menimcha, bunday texnologiyalarni qo‘llash futbolga xalaqit bermaydi. Faqat me’yorida qo‘llanilgani ma’qul. O‘yin sur’atiga ta’sir qilmasligi lozim. O‘z jamoasi uchun jon kuydiradigan har bir muxlis birinchi navbatda adolat bo‘lishini istaydi. Shunday ekan, bunday texnologiyalardan foydalanish zarar qilmaydi.

- Nima deb o‘ylaysiz, O‘zbekistondan yangi Ermatovlar chiqadimi?
— Albatta, bunga ishonaman. Bizda iste’dodli hakamlar ko‘p. Faqat Ermatov darajasiga yetish uchun qattiq mehnat qilish kerak.

- Futbolchi sifatida qaysi o‘yinlar yodingizda qolgan?
— O‘smirlik paytimda Yevropa va jahon chempioni bo‘lganimiz, O‘zbekistonning Yaponiya va Xitoy bilan g‘alabali o‘yinlari yodimda qolgan. Durang bo‘layotgan yoki mag‘lubiyatga uchrayotgan paytingda hal qiluvchi golni urib jamoangga g‘alaba keltirgan o‘yinlar yodda qoladi.

- Agar o‘tmishga qaytish imkoni bo‘lganida yana futbolchilikni tanlarmidingiz?
— O‘tmishga qaytishning imkoni yo‘q. Lekin futbolchilik faoliyatimdan aslo afsuslanmayman. Faoliyatimda muvaffaqiyatlar ham, omadsizliklar ham bo‘lgan. Futbol orqali hech bo‘lmasa bir kishini xursand qilgan bo‘lsam ham bu men uchun baxt. Ayniqsa, g‘alaba qozongan paytingdagi quvonchingni hech qanday pulga sotib ololmaysan.

- Xorijlik qaysi murabbiylarga havas qilasiz?
— Alohida bir murabbiyni ajratib ko‘rsatmayman. Har bir murabbiyning kuchli tomonlarini o‘rganishga, o‘zlashtirishga harakat qilaman. Masalan, Mourinoni olaylik. U kerakli vaqtda natija uchun o‘ynashni yaxshi biladi. Fergyuson, Gvardiola, Zidandan ko‘p narsani o‘rganish mumkin.

- Sizningcha, Ravshan Ermatov jahon chempionati finalini boshqarishi mumkinmi?
— Nega yo‘q bo‘larkan, albatta ha. To‘g‘ri, ruhiy, jismoniy tarafdan bu oson ish emas. Lekin ular bunday holatlardan o‘tishgan. O‘yinlarni bexato boshqarish birgina Ermatovga bog‘liqmas. Agarda Ravshan Ermatov guruhi soat kabi ishlasa, ular albatta finalni boshqarishadi. Men hakamlarimizga omad va final o‘yinini boshqarishlarini tilab qolaman.
“Zamin” yangiliklarini “Youtube”da kuzatib boring