Ўзбекистон милицияси янгича форма кияди

10 апрель куни Ўзбекистон Республикаси президенти Шавкат Мирзиёевнинг «Ички ишлар органларининг фаолияти самарадорлигини тубдан ошириш, жамоат тартибини, фуқаролар ҳуқуқлари, эркинликлари ва қонуний манфаатларини ишончли ҳимоя қилишни таъминлашда уларнинг масъулиятини кучайтириш чора-тадбирлари тўғрисида»ги фармони қабул қилинганди.

Фармон ички ишлар органлари тизимида туб ислоҳотларнинг янги босқичини бошлаб бериши, унинг ижросини таъминлаш, қонун устуворлигига эришиш, ҳуқуқбузарликлар профилактикасини ўз вақтида амалга ошириш, ҳуқуқ-тартибот ва жамоат хавфсизлигини таъминлашга хизмат қилиши, пировард натижада эса фуқаролар ҳуқуқлари, эркинликлари ҳамда қонуний манфаатларини ишончли ҳимоя қилиш борасида ички ишлар органлари бутун тизими ва ҳар бир ходим фаолияти самарадорлиги ошиши кўзда тутилган, деб ёзади Кун.уз нашри.

Фармон тизимда қатор ташкилий ўзгартишлар қилишни ҳам назарда тутади.

Фармонда қайд этилган асосий вазифаларни бажариш бўйича зарур ташкилий ва ҳуқуқий механизмларни амалга ошириш мақсадида Ички ишлар органлари тизимини тубдан ислоҳ қилиш комплекс чора-тадбирлар дастури тасдиқланган.

Бу дастурга кўра, милиция ходимлари учун халқаро стандартлар асосида, фуқаролар онгида ички ишлар органлари ҳақида ижобий имиж шакллантириш мақсадида янги кўринишдаги либослар, атрибуткалар ва белгилар тайёрлаш кўзда тутилган.

Бундай ўзгаришларни жорий қилиш мақсадида Ўзбекистон президентининг махсус қарори ишлаб чиқилмоқда. Тегишли қарор 2018 йилнинг 1 июлига қадар тайёр бўлиши кутилмоқда. “Замин” янгиликларини “Youtube”да кузатиб боринг