Барак Обама хотираларини 60 миллион АҚШ долларига сотмоқчи

  • Дунё
  • 1-03-2017, 21:44
  • 705
  • Барак Обама хотираларини 60 миллион АҚШ долларига сотмоқчи

    Барак ва Мишель Обама Penguin Random House нашриёти билан ғаройиб келишувни имзолади.

    Собиқ президент ва унинг рафиқасининг Оқ уй билан боғлиқ хотиралари акс этган китобни Penguin Random House нашриёти чоп этиш имкониятини қўлга киритди, деб ёзади Qalampir.uz.

    Айтиш лозимки, Барак ва Мишель Обама томонидан ёзилган ушбу китобни нашр этиш имконияти учун қатор нашриётлар курашишди. Бироқ омад Penguin Random House нашриётига кулиб боқди.

    Таъкидлаш жоизки, бу мемуар ҳар қандай нашриёт учун омадли шартнома бўлиши барчага аён эди. Шу сабабли ҳам Penguin Random House асар учун Обамалар оиласига 60 миллион АҚШ доллари миқдоридаги пулни тўлашга бажонидил рози бўлди. Бу ҳақда “Vestifinance.ru” хабар қилмоқда.

    Обамадан аввалги раҳбарлар ҳам президентлик йилларидаги хотиралари ҳақидаги мемуарларини китоб ҳолида чоп этишган. Лекин Обамалар оиласининг мемуари аввалги асарлар ичида энг қиммат нархга сотилган асар сифатида тарихга кириши мумкин.

    АҚШнинг собиқ президентларидан бири бўлмиш Билл Клинтон 2004 йил “Менинг ҳаётим” мемуари учун 15 миллион АҚШ доллари, Жорж Буш “Қарор қабул қилиш нуқталари” мемуари учун 10 миллион АҚШ доллари олганди.

    Барак ва Мишель Обама бундан аввал ҳам ўз мақолаларини Penguin Random House нашриётига тегишли Crown савдо белгиси остида чоп этишарди.

    Собиқ президент ва унинг рафиқасининг нашриёт томонидан чоп этилиши мўлжалланаётган навбатдаги китоби қандай номланиши ҳозирча номаълум.

    Маълумотларга кўра, Обамалар оиласи китобдан тушадиган пулларнинг катта қисмини хайрия ишларига сарф этиш истагидалар. Хайрия пуллари ушбу оила томонидан асос солинган Obama Foundation фонди ҳисобига ҳам ўтказилади.

    loading...
    Яндекс.Метрика