Жерге ұқсас жаңа планета анықталды

Халықаралық астрономдар тобы HD 137010 b деп аталатын жаңа экзопланетаның ашылғанын хабарлады. Ол Жерден шамамен 146 жарық жылы қашықтықта орналасқан, өлшемі жағынан Жерге өте жақын және өз жұлдызының айналасында айналу периоды да ұқсас екені айтылды. Бұл туралы "Гардиан" хабарлады.

Планета NASA-ның "Кеплер" ғарыш телескопының (K2 миссиясы) 2017 жылы жинаған мәліметтері негізінде анықталғаны айтылады. Талдауларға сәйкес, HD 137010 b Жерден тек 6 пайызға үлкен, ал ондағы "бір жыл" 355 күнге созылады. Зерттеушілердің бағалауынша, бұл планетаның "өмір сүруге жарамды аймақта" орналасу ықтималдығы 50 пайызды құрайды - яғни теориялық тұрғыдан бұл аймақта су сұйық күйде болуы мүмкін.

Алайда орбита мен кезеңнің ұқсастығына қарамастан, ол жердегі жағдайдың Жердегідей жеңіл болмауы әбден мүмкін. Жүйедегі негізгі жұлдыз Күнге ұқсас болып саналады, бірақ ол суықтау және күңгірттеу екені атап өтілді. Сол себепті планета бетіндегі температура Марстағы температураға жақын болып, -70 градустан да төмен түсуі мүмкін.

Суинберн технологиялық университетінің докторы Сара Уэббтің айтуынша, планетада судың көп болуы ықтимал, бірақ оның көп бөлігі мұз күйінде қатып қалған болуы мүмкін. Оңтүстік Квинсленд университетінің докторы Челси Хуанг табылған жұлдыздың басты маңыздылығы оның жақындығы мен жарықтығында екенін айтады: ол Жерден шамамен 150 жарық жылы қашықтықта орналасқан.

Салыстыру үшін, бұрын белгілі болған ең жақын Kepler-186f экзопланетасы төрт есе қашықтықта орналасқан және 20 есеге жуық бұлыңғыр екені айтылады. Сондықтан ғалымдардың пікірінше, HD 137010 b болашақта тереңірек зерттелуі мүмкін: жұлдыздың жақындығы мен жарықтығына байланысты келесі ұрпақ телескоптары оның атмосферасы мен бетіндегі жағдайлар туралы маңызды ақпарат береді деп күтілуде.

HD 137010 b — соңғы жаңалықтар