Хорватия ұлттық құрамасының бас бапкері Златко Далич 2026 жылғы футболдан Әлем чемпионатының топтық кезең жеребесінің нәтижелері туралы пікір білдірді. Хорватия L тобында Англия, Гана және Панама құрамаларымен бірге бақ сынайтын болды.

"Бірінші себеттен біз ең мықты құрамалардың бірін, біздің ескі достарымызды — Англияны алдық. Бұл менің бапкерлік мансабымда оларға қарсы бесінші ойыным болады.

Алғашқы ойынымыз дәл соларға қарсы өтетіндіктен, бұл біз үшін сәл қолайсыз, себебі ол өте маңызды әрі бастау үшін шешуші ойын болмақ. Еуропа чемпионатында да осындай жағдай болған, онда біз Англияға минималды есеппен жеңіліп қалған едік.

Алдыңғы турнирде Испанияға да ұтылып қалдық. Еуропа чемпионатындағы ойындарымыз сәтті болмады, бірақ Әлем чемпионаттарының басталуы біз үшін әрқашан табысты болған," — деді Далич Хорватия футбол федерациясының сайтына берген сұхбатында.

"Панама мен Гана — біз жақсы ойын көрсетіп, оң нәтижеге қол жеткізе алатын қарсыластар. Оларды мұқият зерттейміз.

Біздің мақсатымыз — топтан шығу екенін жақсы білеміз. Соңғы Әлем чемпионаттарында жоғары нәтижелерге қол жеткізгеннен кейін бізден қандай деңгейде нәтиже күтетінін түсінеміз.

Алайда біз өзімізге артық қысым түсірмейміз. Бұл турнирден барынша ләззат алуға тырысамыз.

Ең бастысы — алдағы 6 айда ойыншыларымыздың денсаулығы жақсы болып, толық дайындықта болуы, жарақатсыз болуы маңызды." "Бірінші ойында Хорватияға қарсы ойнау Тухель үшін де қолайсыз. Ол маған: "Біз топтық кезеңде кездеспеуге тиіс едік, ширек финалда ойнауымыз керек еді," — деп айтты.

Алайда жеребе осылай шешілді. Барлығы Хорватиядан аулақ болғысы келеді, себебі біз соңғы екі Әлем чемпионатында нағыз ғажайып жасадық.

Жеребе бойынша жағымдысы — алғашқы ойынды 17 маусымда өткіземіз, яғни үйде жақсы дайындалып, соңғы сынақтар үшін екі қарсылас табуға жеткілікті уақытымыз бар. Ойын өтетін қалалар өте ыңғайлы, әсіресе, біздің жанкүйерлеріміз үшін.

Енді оқу-жаттығу лагерін таңдап, жақсы дайындық жасаудан бастауымыз керек, сондай-ақ скауттарымыздың жұмысқа кірісуіне мүмкіндік беруіміз қажет." Қазіргі таңда Хорватия FIFA рейтингінде оныншы орында тұр.

Златко Далич — соңғы жаңалықтар