«Өзбекстан – 2030» стратегиясы жобасында әуе көлігі бағытын күрт жандандыруға арналған нақты мақсаттар белгіленді. Негізгі идея біреу: авиациядағы бәсекені күшейту, ұшу географиясын кеңейту және жолаушыға қолайлылықты арттыру.
Жобада елдегі жекеменшік әуе компанияларының санын 15-ке жеткізу жоспары көрсетілген. Бұл әуе тасымалы нарығында таңдауды көбейтіп, қызмет сапасын арттырып, бәсекені күшейтеді деп күтілуде.
Тағы бір ірі мақсат — жалпы әуе рейстерінің санын 200 мыңға дейін арттыру. Соның ішінде республика өңірлері арасындағы рейстерді 41 мыңға жеткізу, ал Ташкентпен байланысы жоқ өңірлік әуе қатынастарын 1 560-қа дейін көбейту көзделген. Яғни, «барлық жол Ташкентке апарады» деген схема біртіндеп өзгереді.
Инфрақұрылым бойынша да үлкен жоспарлар бар: 5 ірі әуежайды мемлекеттік-жекеменшік әріптестік негізінде жаңғыртып, басқаруға беру, сондай-ақ әуе паркіндегі әуе кемелерінің санын 180-ге жеткізу жоспарланған. Жолаушылар көрсеткіші де өршіл: әуе көлігі қызметін пайдаланушылар санын 24 млн адамға дейін арттыру мақсат етілген.
Қысқасы, стратегия жобасы авиацияда жекеменшік сектор үлесін көбейту, әуежайларды жаңғырту және рейстер санын кеңейту арқылы саланы жаңа қарқынға шығаруды көздейді. Егер жоспарлар қағазда қалмай, іс жүзінде орындалса — жолаушы үшін таңдау көбейеді, бағалар да «ойлануы» мүмкін.
“Zamin”-ді Telegram-нан оқыңыз!
«Меҳмон» тобындағы келушілер бұл жарияланымға пікір қалдыра алмайды.
