Россия Украина пойтахтига 31 та ракета учирди

^{Фото: Reuters}
Россия 21 март куни Украина пойтахти Киевга ракета зарбалари берди, натижада камида 10 киши жароҳатланди. Ҳаво ҳужумидан мудофаа тизимлари барча ракеталарни тутиб олса-да, турар жой бинолари ва саноат объектларига зарар етди.

Киевга зарба сўнгги ҳафталарда кузатилган энг йирик ҳужум саналади. Шаҳар ҳам баллистик, ҳам қанотли ракеталар билан нишонга олинган.

^{Фото: Reuters}
\"44 кунлик танаффусдан кейин душман Киевга яна ракета ҳужумини уюштирди. Барча фавқулодда хизматлар жойида ишламоқда. Ракета ҳужуми оқибатларини бартараф этиш ишлари олиб борилмоқда\", — деди Киев ҳарбий администрацияси раҳбари Сергей Попко.

^{Фото: Киев шаҳар ҳарбий администрацияси}
Шаҳар мэри Виталий Кличконинг айтишича, бутун шаҳар бўйлаб камида 10 киши жароҳатланган. Касалхонага олиб кетилган икки киши орасида 11 ёшли қиз ҳам бор.

^{Фото: Киев шаҳар ҳарбий администрацияси}
\"Украина ҳаво ҳужумидан мудофаа кучлари Россиянинг пойтахтга қаратилган барча 31 та ракетасини уриб туширган\", — деди ҳаво кучлари қўмондони.
Попконинг айтишича, россиялик ҳарбийлар стратегик бомбардимончи самолётлардан фойдаланган. Ҳаво ҳужумидан огоҳлантириш тизими деярли уч соат давом этган.

^{Фото: Reuters}
Кличконинг айтишича, ракета қолдиқлари бир нечта турар жой бинолари, саноат объектлари ва болалар боғчасига тушган.