Стармер Трамп ва Путинни танқид қилди
Буюк Британия Бош вазири Кир Стармер АҚШ ва Россия етакчилари — Доналд Трамп ҳамда Владимир Путинга нисбатан кескин фикрлар билдирди. У бу ҳақда ITV News телеканалига берган интервюсида сўз юритди.
Сиёсатчининг таъкидлашича, Яқин Шарқдаги можаролар сабаб юзага келган энергетик инқироз, шунингдек, Украинадаги уруш ортидан энергия ресурслари нархининг кескин ўзгариши Буюк Британия иқтисодиётига жиддий босим ўтказмоқда.
Стармернинг айтишича, оддий фуқаролар ва тадбиркорлар учун электр энергияси нархларининг доимий равишда ўзгариб туриши жиддий муаммога айланган. “Бутун мамлакат бўйлаб оилалар ва бизнес вакиллари учун тўловлар баъзан ошиб, баъзан пасайиб кетаётгани — ва буларнинг Владимир Путин ёки Доналд Трампнинг глобал миқёсдаги ҳаракатлари билан боғлиқ экани ростакамига жонимга тегди”, дея таъкидлади у.
Шу билан бирга, Бош вазир Доналд Трампнинг жорий йил 7 апрель куни айтган “бутун бошли цивилизация ҳалок бўлиши мумкин” деган фикрига изоҳ беришдан тийилди. У бундай кескин ибораларни ишлатмаслигини билдириб, ўз фаолиятида ҳар доим Британия қадриятларига амал қилишини урғулади.
Расмий Лондон раҳбарининг ушбу баёноти халқаро сиёсий майдонда яна бир бор кескин мунозараларга сабаб бўлиши кутилмоқда.
