Трамп Ҳўрмуз бўғози блокада қилинганини эълон қилди

АҚШ президенти Дональд Трамп Ҳўрмуз бўғози бўйлаб тўлиқ блокада бошланганини маълум қилди. Унинг бу баёноти АҚШ ва Эрон ўртасидаги музокаралар натижа бермаганидан кейин эълон қилинди.

Трампнинг сўзларига кўра, АҚШ ҳарбий-денгиз кучлари бўғоз орқали ҳаракатланмоқчи бўлган ҳар қандай кемаларни тўхтатиш ва назорат қилиш ишларини бошлаган. Шунингдек, у халқаро сувларда Эронга “ноқонуний тўловлар” амалга оширган кемаларни текшириш ва ушлаш бўйича ҳам кўрсатма берганини айтган.

Президент, шунингдек, Ҳўрмуз бўғози атрофида қўйилган миналарни зарарсизлантириш ишлари бошланганини ҳам таъкидлаган. Унинг фикрича, Эрон вазиятни қандай ҳал қилишни яхши билади, аммо бу жараёнда бошқа давлатлар ҳам иштирок этади.