Лех Валенса: “Пенсиям етмайди”, собиқ президент шикоят қилди

Полшанинг собиқ президенти Лех Валенса пенсия миқдори етарли эмаслигини айтиб, бу борада ўз норозилигини билдирди. У бу ҳақда “О2” нашрига берган интервюсида сўз юритди.

1990–1995 йилларда мамлакатни бошқарган Валенса ҳозирда президентлик пенсиясини олади. Мазкур тўлов амалдаги давлат раҳбари маошининг 75 фоизига тенг бўлиб, тахминан ойига 3770 долларни ташкил этади.

Собиқ президентнинг айтишича, агар пенсияси етарли бўлганида, у дам олиб, тинч ҳаёт кечирган бўларди. “Агар ҳаммаси етарли бўлганида, мен қўзиқорин теришга ёки балиқ овига борардим. Аммо ҳозир ҳам ишлашга мажбурман, дунё бўйлаб юриб, ишлаяпман”, — дейди у.

Валенса пенсиясининг катта қисми кундалик харажатлар, тиббий хизматлар ва профессионал фаолиятини давом эттириш учун сарфланаётганини таъкидлади.

Шунингдек, у яна бир пенсия олиш ҳуқуқига эга бўлса-да, принципиал сабабларга кўра ундан фойдаланмаётганини маълум қилди. “Мен 20 йилдан бери бу пенсияни олмайман. Бир тийинни ҳам. Чунки Полша ҳали ҳам камбағал”, — дея қўшимча қилди собиқ президент.