Дуа Липа сурати сабаб Samsung’ни судга берди
Британиялик машҳур поп хонанда Dua Lipa суратидан рухсатсиз тарзда фойдаланилгани сабабли Samsung Electronics компаниясини судга берди. Бу ҳақда Reuters ахборот агентлиги хабар тарқатди.
Хонанда компаниядан камида 15 миллион доллар миқдорида товон пули ундиришни талаб қилмоқда. Даъво ҳужжатларида таъкидланишича, Samsung телевизорлари қутисининг олд қисмига Дуа Липанинг муаллифлик ҳуқуқи билан муҳофаза қилинган сурати жойлаштирилган. Бу эса харидорларда хонанда мазкур маҳсулотни қўллаб-қувватлаган деган фикрни шакллантириб, компанияга тижорий манфаат келтирган.
Телевизор қутиларида қўллангани айтилган тасвир “Dua Lipa — Backstage at Austin City Limits, 2024” номи билан танилган. Мазкур суратга оид барча муаллифлик ва эгалик ҳуқуқлари шахсан Дуа Липага тегишли экани қайд этилмоқда. Даъво аризаси 8 май куни California federal courtга тақдим этилган.
Муаллифлик ҳуқуқи ва савдо белгисини бузиш билан бир қаторда, Дуа Липа Samsung Electronics’ни реклама ҳуқуқларини ҳам поймол қилганликда айбламоқда. Хонанданинг ҳуқуқшунослари суд ҳужжатларига ижтимоий тармоқлардаги постлар ҳамда изоҳлар скриншотларини ҳам илова қилган.
Маълум қилинишича, ушбу изоҳлар хонанданинг телевизор қутисидаги сурати харидорларни маҳсулот сотиб олишга ундаганини тасдиқлаш мақсадида келтирилган. Скриншотлардан бирида мухлис телевизорни “фақат Дуа борлиги учун” харид қилишини ёзиб қолдирган.
Дуа Липа 2025 йил июнь ойида Samsung томонидан қоидабузарликка йўл қўйилгани ҳақида хабар топган. Шундан кейин хонанда компаниядан ўз суратидан фойдаланишни зудлик билан тўхтатишни талаб қилган.
Samsung Electronics матбуот хизмати эса айни пайтда суд жараёни юзасидан изоҳ бериш имкони йўқлигини билдирган.
