Иштихон туманида янги айланма йўл очилди

Самарқанд вилояти Иштихон туманида 4 километр узунликдаги янги айланма йўл фойдаланишга топширилди. Бу ҳақда вилоят ҳокимиятининг матбуот хизмати хабар берди.

Янги трасса туман марказидаги транспорт юкини камайтириш, шунингдек Митан қишлоғи ва М-37 автомобиль йўли билан транспорт алоқасини яхшилаш мақсадида қурилди. Очилиш маросимида Самарқанд вилояти ҳокими Адиз Бобоев ва Бош прокурорнинг биринчи ўринбосари Баҳриддин Валиев қатнашди.

Лойиҳани амалга ошириш қиймати 40 миллиард сўмни ташкил этди. Ҳисоб-китобларга кўра, йўлни ишга тушириш Иштихондаги транспорт тиқилинчи даражасини тахминан 40 фоизга камайтиради, шунингдек Қўшрабод, Каттақўрғон ва Пайариқ туманлари йўналишидаги юк транзитини тезлаштиради.

Қурилиш доирасида 73 метр узунликда ва 15 метр кенгликдаги кўприк ҳам барпо этилди. Лойиҳа ногиронлиги бор шахсларга мослаштирилган 3,5 километр велосипед ва пиёдалар йўлини, иккита замонавий автобус тўхташ жойини, шунингдек 155 та қуёш батареяли чироқ ўрнатишни ўз ичига олади.