Тарсаки ва шов-шувлар ортидаги Гулинур 32 ёшда
Хоразмлик таниқли хонанда Гулинур 7 апрель куни 32 ёшни қаршилади. Водий ва Хоразм тўйларининг энг талабгир санъаткорларидан бири бўлган ижодкор шўх қўшиқлари билан танилган бўлса-да, табиатан оғир-босиқ ва ҳаётга ўзгача қарашга эга экани билан ҳам ажралиб туради. Унинг “Жайлан”, “Керак эмас”, “Дуйдим ахир”, “Юрагимни яралади”, “Жўжи кара” каби қўшиқлари мухлислар қалбидан жой олган.
Гулинур 1994 йил 7 апрелда Хоразм вилояти Шовот туманида туғилган. Оилада иккинчи фарзанд. Санъатга 2013 йилда қадам қўйган. У дастлаб тўйларда турли қўшиқларни попури қилиб ижро этиб, интернет орқали танилганини эслайди. Ўша пайтларда ижтимоий тармоқлар кучли бўлмагани учун видеолар ва телефон рақамлар орқали ўзини танитган.
У отасини ўзининг энг катта таянчи деб билади. Отаси унга доим қўллаб-қувватлаш бериб, “бу йўлни бошладингми, охиригача бор” деган. Ҳатто “ўғлим йўқ, сен ҳам ўғлим ҳам қизимсан” деб руҳлантирган. Гулинур бугунги ютуқларини ота-она дуоси билан боғлайди.
Хонанда ўз қарашларида санъат ва шоу-бизнесни ажратиб кўради. У Юлдуз Усмонова, Озода Нурсаидова ва Озодбек Назарбеков ижодини ҳақиқий санъат деб баҳолайди, ҳозирги кўплаб ёшларни эса кўпроқ шоу-бизнес йўналишида деб ҳисоблайди.
Гулинур санъатга пул ёки машҳурлик учун эмас, орзу ва ҳавас билан кирганини айтади. У катта саҳналар, мухлислар олқиши ва концерт беришни болалигидан орзу қилган. 2016 йилдан ўз қўшиқларини чиқара бошлаган, 2018 йилда илк катта концертларини ўтказган.
Табиатан жуда таъсирчан эканини таъкидлайди. Баъзан оддий гапдан ҳам таъсирланиб йиғлаб юборади. У инсонларнинг ҳолатига ҳам беэътибор бўла олмаслигини айтади.
Гулинурнинг ижодий қарашлари ҳам ўзига хос. У ҳозирча асосан шўх қўшиқлар куйлаётганини, аммо келажакда маъноли асарлар яратиш нияти борлигини билдирган.
Шу билан бирга, у саҳнада қаттиққўллиги билан ҳам танилган. Бир неча ҳолатларда тўйларда жанжал чиқиб кетгани, ҳатто мухлисларга қўл кўтаргани ҳақида ҳам гапирган. Унинг айтишича, саҳнада интизом бўлиши керак, айниқса ҳурмат чегараси бузилганда.
Шахсий ҳаётида эса у турмуш ўртоғи билан 2020 йилда танишиб, турмуш қурган. У уй ишларини ҳам, саҳна фаолиятини ҳам мувозанатда олиб бораётганини айтади. Ҳатто рашк туфайли ижтимоий тармоқлар билан боғлиқ чекловлар қилгани ҳам маълум.
Гулинур қимматбаҳо автомобилларга ҳам қизиқади. У аввал Tahoe, кейин эса Lexus харид қилган, отасига ҳам машина совға қилган.
