Лионел Месси хет-трики Интер Миами жамоасини ғалабага етаклади
MLS доирасидаги ФК Синсиннати ва Интер Миами ўртасидаги ўйин ҳақиқий голли шоуга айланди. Учрашув давомида икки бор ҳисобда ортда қолган меҳмонлар, якунда Лионел Месси бошчилигидаги ҳужумкор ўйин эвазига 5:3 ҳисобида ғалабани тантана қилишди. Бу ҳақда Goal.com хабар беради.
Лионел Месси учрашув қаҳрамонига айланди. Аргентиналик футболчи нафақат учта гол урди, балки жамоадошига голли узатма ҳам амалга оширди. Мезбонлар сафида Кевин Денкей, Павел Буча ва Эвандер ўз номларини таблога ёздириб қўйишган бўлса-да, ҳимоядаги хатолар уларга қимматга тушди.
Ўйиннинг 55-дақиқасида Месси ҳисобни тенглаштирган бўлса, кейинчалик Матео Силветти ва Герман Бертераме ҳам ўз голларини киритишди. 89-дақиқада эса Месси ўзининг учинчи голини уриб, якуний нуқтани қўйди ва жамоасига муҳим уч очкони тақдим этди.
Интер Миами бу мавсумда ҳимояда муаммоларга дуч келаётган бўлса-да, ҳужум чизиғидаги маҳорат эвазига рақибларини таслим этишда давом этмоқда. Бундай ўйин услуби ҳар доим ҳам барқарор натижа бермаслиги мумкин, аммо Месси майдонда бўлган вақтда жамоа исталган рақиб дарвозасига кўп гол уришга қодир.
