Бобир Абдихолиқов: "Европанинг кучлироқ чемпионатида тўп тепиш ниятидаман"

Ўзбекистон терма жамоаси ҳамда \"Энергетик-БГУ\" ҳужумчиси Бобир Абдихолиқов Россияга қарши баҳс олдидан фикрлари билан ўртоқлашди.

- Россия билан биринчи марта ўйнаяпмиз. Ўзига хос тарихий учрашув бўлади. Бу борада нима дея оласиз?
- Худо хоҳласа, эртага ғалаба учун майдонга тушамиз. Халқимизни хурсанд қилиш ниятидамиз.

- Терма жамоа йиғинидан кейинги режалар қанақа?
- Йиғин якунлангач, яна Беларусга қайтишим керак. БАТЭ билан Кубок доирасидаги ўйинимиз бор. Ўша ўйиндан сўнг дам олишга чиқамиз. Озгина дам олиб, кейин бир қарорга келамиз.

- Польша ва яна турли Европа клубларидан таклифлар борлигини эшитдик...
- Ҳа, таклифлар бор. Худо хоҳласа, чемпионат ўйинларини тугатиб, шошмасдан бир қарорга келамиз.

- Клуб раҳбарияти ва менежерлар ҳал этишадими ёки барибир сиздан ҳам сўрашадими?
- Охирги сўзни мен айтаман. Хоҳишимга қараб, йўл тутилади.

- Ўзингизга қолса, қайси вариантни танлаган бўлардингиз?
- Европанинг кучлироқ чемпионатида тўп тепиш ниятидаман.

- \"Энергетик-БГУ\" клуби вакиллари қандай фикрда?
- Улар кучлироқ чемпионатга йўл олишимни исташади.