Мбаппе: 400 гол ҳали тарих яратиш учун етарли эмас

Мадриднинг "Реал" жамоаси ҳужумчиси Килиан Мбаппе ЖЧ-2026 саралаш босқичи доирасида Франция ва Украина терма жамоалари ўртасидаги ўйинда (4:0) ўзининг фаолиятидаги 400-голини урди. 26 ёшли футболчи ушбу ўйинда дубль муаллифи бўлди ва иккинчи голи унинг профессионал даражадаги 400-голи сифатида қайд этилди.

"Бундай рақам ҳеч кимни ҳайратлантирмайди. Футбол тарихида из қолдиришни хоҳлайман, бунга эришиш учун камида яна 400 та гол уришим керак.

Биз бир футболчини биламиз, у 950 тадан ошиқ гол урган (Роналду), ва бошқасини, деярли 900 та гол билан (Месси). 400 та гол – одамларни лол қолдирадиган натижалар қаторига кириш учун етарли эмас", – деди Мбаппе ўйиндан кейинги интервьюсида.

Якшанба куни Франция терма жамоаси сафарда Озарбайжонга қарши ўйинда майдонга тушади.