Леау: Ҳимоячиларга қарши ўйнаш ёқади

Португалиялик ҳужумчи ва «Милан» футболчиси Рафаэл Леау дриблингнинг катта ишқибози эканлигини маълум қилди. У техникаси кучли, тўп билан маҳирона муомала қила оладиган ва жасорат билан рақибларни алдаб ўта оладиган футболчиларга доим ҳавас қилганини айтди.

«Очиғини айтсам, бирга бир вазиятларда, ҳатто икки ёки уч нафар ҳимоячига қарши ҳам ўйнашни яхши кўраман. Мен Роналдиньо, Куарежма ва Роналду каби футболчилар даврида ўсганман, улар ўзларининг майдондаги техник ҳаракатлари билан мени қойил қолдирган», – дейди Леау pianetamilan.it сайти билан суҳбатда.

Эслатиб ўтамиз, Рафаэл Леау 2019 йилдан бери «Милан» шарафини ҳимоя қилиб келади. У бунгача Франциянинг «Лилль» ва Португалиянинг «Спортинг» клубларида ўйнаган.