Файзуллаев ва Шомуродов “Башакшеҳир”га ғалабани олиб берган кеча (видео)

Туркия Суперлигасининг 14-туридан ўрин олган “Қосимпошо” – “Башакшеҳир” баҳси кўпчилик кутгандан ҳам жозибали ўтди. Устоз Нури Шаҳин бошқарган меҳмон жамоа рақиб майдонида 3:1 ҳисобида ишончли тарзда зафар қучди ва бу кечада асосий ролни айнан ўзбекистонлик футболчилар бажарди.

Учрашувни фаол ва ҳужумкор бошлаган “Башакшеҳир” 26-дақиқада ҳисобни очди — Аббосбек Файзуллаев жарима зарбасини моҳирона ижро этиб рақиб дарвозасига тўпни йўллади. Аббоснинг ҳаракатидан жамоа руҳи сезиларли кўтарилди ва орадан кўп вақт ўтмай, Амине Ҳарит биринчи таймнинг охирида ҳисобни 2:0 қилиб қўйди.

Иккинчи бўлимда “Қосимпошо” жонланиб, Ароус орқали битта гол қайтарди. Лекин бу гол меҳмонларнинг ўйинини янада кучайтиришига сабаб бўлди. Учрашувнинг қўшимча дақиқаларида эса ўзбекистонлик яна бир юлдуз саҳнага чиқди — Элдор Шомуродов. У жарима майдони ташқарисидаги вазиятдан усталик билан фойдаланиб, дарвозабонни доғда қолдирди ва ушбу голи билан учрашувга нуқта қўйди.

Шу тариқа, Ўзбекистон миллий жамоаси сардори Элдорнинг Суперлигадаги голлари сони 10 тага етди — у Туркияда ҳам ҳақиқий етакчига айланиб бормоқда. Аббосбек эса ўйиндан-ўйинга ўсишда давом этяпти, жамоа учун ҳал қилувчи вазиятлар яратмоқда.

Ушбу муҳим ғалаба “Башакшеҳир”га 16 очко тўплаб, турнир жадвалида 9-поғонага кўтарилиш имконини берди. “Қосимпошо” эса 13 очко билан 14-ўринда қолиб кетди.

Туркия Суперлигаси. 14-тур
Қосимпошо – Башакшехир 1:3
Голлар: Ароус 79 – Аббосбек Файзуллаев 26, Ҳарит 45+4, Элдор Шомуродов 90+3.

Башакшехир таркиби:
Шенгезер, Булут, Дуарте, Опоку, Опери, Файзуллаев (Гурелер, 78), Кемен (Креспо, 78), Ҳарит (Да Коста, 72), Зелке, Шомуродов.