Атлетико ҳимоячиси Клеман Ленглени икки ойга йўқотди

Мадриднинг “Атлетико” клуби ҳимоячиси Клеман Ленгле тиззасидан олган жароҳати сабаб узоқ муддат сафдан чиқди. Франциялик футболчи Испания Кубоги 1/16 финалида “Атлетико Балеарес”га қарши учрашувда (3:1) жароҳат олди ва баҳснинг 10-дақиқасидаёқ алмаштирилди.

Тиббий текширув натижасига кўра, Ленгледа қўшимча асоратларсиз тиззадаги медиал коллатерал бойламнинг жиддий чўзилиши аниқланган. Испания ОАВ хабарига кўра, футболчининг тикланиши камида икки ой давом этади.

Шу боис у мавсумнинг қишки қисми учрашувларининг сезиларли қисмини ўтказиб юборади. Жорий мавсумда 30 ёшли Ленгле Ла Лигада 9 та ўйинда майдонга тушиб, 1 та сариқ карточка олди.