Арбелоа Моуриню бошқарувидаги «Бенфика» билан ўйинни кутмоқда
Мадриднинг «Реал» жамоаси бош мураббийи Альваро Арбелоа Чемпионлар лигасида «Бенфика»га қарши бўладиган учрашув олдидан фикр билдирди. Бу ҳақда euro-football.ru хабар беради.
Ўйин Лиссабонда умумий босқичнинг сўнгги тури доирасида 28-январ, чоршанба куни бўлиб ўтади. «Бургутлар»ни ҳозир Жозе Моуриню бошқармоқда, у яқинда «Реал»га қайтиши мумкинлиги ҳақида ҳам гап-сўзлар тарқалган эди.
«Мақсадимиз — кучли саккизликдан жой олиш. «Бенфика» стадиони биз, мадридчилар учун ҳар доим алоҳида аҳамиятга эга бўлиб қолади», — дея Арбелоанинг сўзларини келтиради Madrid Xtra.
Эслатиб ўтамиз, 2014-йил май ойида Португалия пойтахтидаги «Эштадиу да Луш» аренасида «қаймоқранглилар» Чемпионлар лигасини ўнинчи бор ютиб, финалда «Атлетико»ни 4:1 ҳисобида мағлуб этганди. Ҳозирги мураббий Арбелоа ўшанда «Реал» ҳимоячиси сифатида захирада қолган.
