Радимов Италия терма жамоаси савиясини паст баҳолади

Санкт-Петербургнинг «Зенит» клубида тўп сурган собиқ ярим ҳимоячи, ҳозирда футбол мутахассиси сифатида фаолият юритаётган Владислав Радимов Италия футболи ҳолати ҳақида фикр билдирди. Бу ҳақда euro-football.ru хабар беради.

Унинг таъкидлашича, Италия футболи инқироз даврини бошдан кечирмоқда: клублар легионерлар ҳисобига натижа чиқариб турган бўлса-да, терма жамоанинг даражаси паст ва жаҳон чемпионатига чиқмай қолиш хавфи мавжуд.

Эслатиб ўтамиз, Италия терма жамоаси 2026 йилги жаҳон чемпионатига тўғридан-тўғри йўлланмани қўлга кирита олмади. Дженнаро Гаттузо шогирдлари йўлланма учун плей-офф учрашувларида қатнашади.

2026 йилги мундиал ёз ойларида Шимолий Америкада бўлиб ўтади. Нуфузли мусобақага АҚШ, Канада ва Мексика мезбонлик қилади.