Дро Фернандес ПСЖ сафида илк бор асосий таркибда ўйнади

ПСЖ ярим ҳимоячиси Дро Фернандес Париж клубида илк марта старт таркибида майдонга тушди. 18 ёшли футболчи Лига 1 доирасида «Мец»га қарши учрашувни биринчи дақиқалардан бошлаб ўйнади. Бу ҳақда euro-football.ru хабар беради.

Парижликлар баҳсни 3:0 ҳисобида якунлаб, ишончли ғалабани қўлга киритди. Ёш испаниялик эса 63-дақиқада захирага олинди.

Ўйиндан кейинги суҳбатда Фернандес ўзини яхши ҳис қилаётганини, ўйинини аста-секин кучайтириб бораётганини таъкидлади. «Бу ерга кўпроқ ўйнаш, ритмни топиш учун келдим. Ғалаба қилганимиздан хурсандман, энди ишлашда давом этиш керак», — деди у L1+га берган интервьюсида.

Эслатиб ўтамиз, француз гранди Дро Фернандесни қишки трансфер ойнасида «Барселона»дан 8,2 миллион евроға сотиб олганди.