Ривожланиш кубоги. Ўзбекистон U-17 Қозоғистонни енгиб бронзани олди
U-17 Ривожланиш кубогида бронза медали учун ўтган баҳс ҳақиқий драмали сценарийга айланди. Сергей Чигодаев шогирдлари 3-ўрин учун ўйинда Қозоғистонни 3:2 ҳисобида мағлуб этиб, мусобақани медаль билан якунлади.
Учрашув аввалида жамоалар эҳтиёткорлик билан ўйнаган бўлса-да, ҳисоб 23-дақиқада очилди: Расул Акимов аниқ зарба билан Қозоғистонни олдинга олиб чиқди — 1:0. Қозоғистонликлар яна ҳисобни оширишга муваффақ бўлишди: 42-дақиқада Меирам Балтабаев гол урди ва танаффусга жамоалар 2:0 ҳисобида йўл олди.
Иккинчи бўлимда ўйиннинг энг “қизиқ” бурилиши кузатилди. 54-дақиқада Меирам Балтабаевнинг автоголи сабаб Ўзбекистон ҳисобни қисқартиришга муваффақ бўлди — 2:1. Шундан кейин ҳар икки жамоа ғалаба учун борини ташлади: темп ошиб кетди, майдонда кескинлик ҳам, эҳтирос ҳам кўпайди.
Ўйин сўнгги дақиқаларда ҳал бўлди. 79-дақиқада Суҳроб Садиржонов жуда муҳим гол урди — 2:2. Орадан бир дақиқа ҳам ўтмай, 80+1 да Мироншоҳ Эшпўлатов ўз номини таблога ёздириб, ғалаба голига муаллифлик қилди — 2:3. Шу тариқа Қозоғистон 3-ўрин учун баҳсда 2:3 ҳисобида мағлуб бўлди.
U-17 Ривожланиш кубоги
3-ўрин учун баҳс
Қозоғистон — Ўзбекистон 2:3
Голлар: Расул Акимов 23\', Меирам Балтабаев 42\' – Меирам Балтабаев автогол 54\', Суҳроб Садиржонов 79\', Мироншоҳ Эшпўлатов 80+1\'
Бошланғич таркиб: Денис Журавлёв, Миржамол Анваров, Машҳурбек Абдисолиев, Абубакир Раҳимов, Адис Абдунабиев, Ислом Равшанов, Микромил Муродов, Муҳаммад Маматов, Жаҳонгирмирзо Ўктамбоев, Асилбек Алиев, Лазиз Абдураимов.
Захирадагилар: Олим Шомуродов, Элсевар Олимов, Мироншоҳ Эшпўлатов, Аҳрорбек Равшанов, Амирхон Эркинов, Билол Алиев, Муҳаммадодилхон Орифхонов, Суҳроб Садиржонов, Рустам Алиев, Абдулборий Зоиджонов.
Қисқаси, бу ғалаба шунчаки 3-ўрин эмас — ёшларимизнинг характерини кўрсатган беллашув бўлди. Сўнгги дақиқалардаги икки гол эса: “ўйин тугамагунча ҳеч нарса ҳал бўлмайди” деган ҳақиқатни яна бир бор исботлади.
