"Наполи" камбэк қилиб "Лечче"ни мағлуб этди: 3 очко "чўнтак"да (видео)
Италия А Сериясининг 29-турида «Наполи» ўз майдонида «Лечче» жамоасини қабул қилди. Қизиқарли ва драматик кечган баҳс якунида неаполликлар 2:1 ҳисобида ғалаба қозониб, турнир жадвалидаги ўрнини янада мустаҳкамлади.
Учрашув кутилмаган ҳолда меҳмонлар устунлиги билан бошланди. Ўйиннинг 3-дақиқасида Зиберт аниқ зарба билан ҳисобни очиб, «Лечче»ни олдинга олиб чиқди. Илк бўлимда мезбонлар бир неча бор хавфли вазиятлар яратган бўлса-да, ҳисоб ўзгармади.
Иккинчи бўлим бошланиши билан «Наполи» ҳужумкор ўйинни кучайтирди. Натижада 46-дақиқада ҳужумчи Расмус Ҳойлунд рақиб дарвозасини ишғол қилиб, ҳисобни тенглаштирди. Бу гол мезбонларга янги куч ва ишонч бағишлади.
Учрашувнинг 67-дақиқасида эса Маттео Политано чиройли ҳужумни гол билан якунлаб, «Наполи»ни олдинга олиб чиқди. Қолган дақиқаларда «Лечче» ҳисобни тенглаштиришга уринган бўлса-да, неаполликлар устунликни сақлаб қолишга муваффақ бўлди.
Шу тариқа, Антонио Конте бошқараётган «Наполи» очколари сонини 59 тага етказиб, турнир жадвалида 3-ўринни эгаллаб турибди. «Лечче» эса 27 очко билан ҳозирча 16-поғонада қолмоқда.
А Серия. 29-тур
Наполи — Лечче 2:1
Голлар: Зиберт 3 (0:1), Ҳойлунд 46 (1:1), Политано 67 (2:1).
Наполи: Мерет, Буонджорно, Оливера, Бекема, Гилмор, Ангисса (Мактоминай, 46), Спинаццола (Гутиеррес, 73), Политано (Маццокки, 73), Элмас (Де Брюйне, 46), Сантос, Ҳойлунд.
