“Реал” Камавинга билан хайрлашиш ва сотишга тайёр

\"Реал Мадрид\" яримҳимоячиси Эдуардо Камавинга атрофидаги вазият кескин ўзгариши мумкин. El Mundo нашри маълумотига кўра, Мадрид клуби 23 ёшли футболчини ёзги трансфер ойнасида сотишга тайёр турибди.

Манбада қайд этилишича, клуб раҳбарияти Камавинганинг ўйинидаги барқарорсизлик ва майдондаги баъзи интизомий ҳолатларни узоқ вақтдан бери кузатиб келмоқда. Шу омиллар унинг келажаги бўйича жиддий саволлар туғдирган.

Сўнгги бор бу масала Чемпионлар лигаси чорак финалида \"Бавария\"га қарши кечган 4:3 ҳисобидаги жавоб ўйинидан кейин янада кучайди. Ушбу баҳсда Камавинга 86-дақиқада майдондан четлатилган эди.

Вазият Франциялик футболчининг Ҳарри Кейнга нисбатан қоидабузарлиги ва кейинчалик тўп билан нотўғри ҳаракати ортидан иккинчи сариқ карточка олиши билан якунланган. Бу эпизод “Реал” ичида ҳам турлича муҳокама қилинган.

Гарчи клуб расман ҳакам қароридан норози бўлса-да, манбаларга кўра, асосий эътибор айнан футболчининг хулқ-атвори ва босим остидаги реакциясига қаратилган. Раҳбарият бу ҳолатни жиддий сигнал сифатида баҳоламоқда.

Айтилишича, “Реал” Камавингани сотиш орқали катта маблағ жалб қилиб, янги трансферларни молиялаштиришни режалаштирмоқда. Бу эса ёзда клубда жиддий ўзгаришлар бўлиши мумкинлигини кўрсатмоқда.