Ўзбекистон U-17 пенальтиларда Японияга имкониятни бой берди
Саудия Арабистонида ўтаётган U-17 Осиё кубогида яримфиналнинг дастлабки учрашуви якунига етди. Ўзбекистон ўсмирлар терма жамоаси финал йўлланмаси учун Японияга қарши майдонга тушди ва жуда драматик баҳсда пенальтилар сериясида имкониятни бой берди.
Учрашув вакилларимиз учун яхши бошланди. 28-дақиқада Асилбек Алиев пенальтидан унумли фойдаланиб, Ўзбекистон U-17 терма жамоасини ҳисобда олдинга олиб чиқди. Бу гол футболчиларимизга қўшимча ишонч берди ва биринчи бўлимда жамоамиз рақибга муносиб қаршилик кўрсатди.
Иккинчи бўлимда Япония босимни кучайтиришга ҳаракат қилди. Ўзбекистон ёшлари эса ҳимояда тартибли ўйнаб, ҳисобни сақлаб қолишга интилди. Аммо учрашувнинг энг оғир лаҳзаси қўшимча дақиқаларда юз берди. 90+7-дақиқада Чимезиекаи гол уриб, ҳисобни тенглаштирди.
Асосий вақт 1:1 ҳисобида якунланди ва финалчи пенальтилар сериясида аниқланди. Афсуски, омад бу сафар Япония томонида бўлди. Пенальтилар сериясида япон футболчилари 3:2 ҳисобида устун келиб, финалга йўл олди.
Шу тариқа, Ўзбекистон U-17 терма жамоаси Осиё кубогидаги иштирокини яримфиналда якунлади. Гарчи финалга чиқиш насиб қилмаган бўлса-да, ёшларимиз бутун мусобақа давомида характер, ишонч ва курашувчанлик намойиш этди.
Энг муҳими, Ўзбекистон U-17 жамоаси мазкур турнир орқали Жаҳон чемпионати йўлланмасини қўлга киритди. Бу эса ушбу авлод учун катта тажриба ва келажакдаги янада йирик мақсадлар сари муҳим қадам ҳисобланади.
Осиё кубоги U-17. Яримфинал
Ўзбекистон U-17 — Япония U-17 1:1
Пенальтилар серияси: 2:3
Голлар: Асилбек Алиев, 28 пенальти — Чимезиекаи, 90+7.
Ўзбекистон U-17: Олимжон Шомуродов, Муҳаммад Ҳакимов, Муҳаммад Маматов, Амирхон Эркинов, Ислом Равшанов, Асилбек Алиев, Абдураимов 70, Сухроб Садиржонов, Орифхонов 65, Миржамол Анваров, Аҳрор Равшанбеков, Адис Абдунабиев, Абдисолиев 65, Абубакир Раҳимов.
Қисқаси, бу мағлубият аламли бўлди, айниқса гол 90+7-дақиқада ўтказиб юборилгани юракни “ой-вой” қилди. Аммо бу жамоа бош эгиши керак эмас. Яримфинал, Жаҳон чемпионати йўлланмаси ва кучли рақибларга қарши мардона ўйин — бу авлодда катта келажак борлигини кўрсатди.
